Diskarte'ng inartista

Sabado. Alas diyes sa buntag. Sulod sa grocery section sa Green Meadow Emporium ning dakbyan. Naglingkod si Rudy, diyes anyos, sa lingkuranan sa mga maghuwat sa kauban nga nangompra. Tugnaw kaayo dinhi kay natumong sa dakong air conditioner nga nagbulhot og bugnaw'ng hangin.

Nikuray si Rudy. Nisamot iyang kahidlaw nga makakaon og hotdog. Daghan ra ba kaayong mga customer nga nagbalikbalik og palit og hotdog. Labi na gyud ang lalaking mistisohon nga nagsul-ob og itom nga t-shirt ug maong nga long pants.

Katulo na magbalikbalik sa lotoanan sa hotdog nga naa ra’s tungod sa huwatanan nga mga lingkuranan. Sikit sa lingkuranan ni Rudy ang gilingkuran sa tawo. Gitulon na lang ni Rudy iyang laway nga nitubod sa pagkatimaho niya sa kahumot sa hotdog nga gikaon sa iyang tupad.

Kabus kaayo ang pamilya ni Rudy. Bugtong siyang anak. Iyang amahan nga si Andres drayber og habalhabal. Iyang mama nga si Rosa maninda og puto’g sikwate makadlawon. Naa siya magtungha sa ikaupat nga grado sa saring publiko lang, sa baryo Tagituho.

Naa sila magpuyo sa eskwater erya sa maong baryo. Tagsa ra kaayo sila makasulod og department store. Maglaway gani siya’s iyang mga klasmet nga adunahan ang mga ginikanan. Kay mga lami og bawon. Sa recess hotdog ang paliton. Siya adto’s layo magkaon. Duol sa flagpole aron di makita iyang bawon nga kanunay lang buwad o ginamos.

Karon giswerte sila kay may ig-agaw si papa niya nga suod kaayo sa iyang papa. Gikan sa abroad iyang Tiyo Gaspar. Ulitawo pa nga nag-welder sa Saudi Arabia. Giregalohan iyang papa’g cash nga singko mil pesos. Nakapamalit sila’g tapak sa ilang atop nga buslot na. Ug dapat sa mga bongbong sa ilang barungbarong nga nadunot. Dunay usa ka libo nahibilin, gipangompra ni mama Rosa niya. Nakahukom siyang iyang diskartehan iyang mama nga papaliton og hotdog. Kanang di gyud siya kabalibad. Nagsigi si Rudy ug handuraw kun unsay maayong diskarte.

Unya may niabot nga babaye nga nag-itom sab og blouse. Nagpahiyom nga niduol sa lalaking nagkaon og hotdog.

"Nagsigi ka na man la’g kaon diha! Wa man ko nimo salini og hotdog!" sa babaye nga paraygon og tono. Manag-uyab tingale sila, sa obserbasyon ni Rudy.

"Pagpalit la’g imo o" sa lalaki dungan ang pagtunol niya og tibuok usa ka gatos ka pesos ngadto sa babaye. Gidawat sa babaye ang papel de banko. "Labad lagi akong ulo. Nikaon lang ko aron malimtan ang kalabad. Gilingaw-lingaw ko la’g kaon ang labad sa ulo nako" dugang sa lalaki.

Paghuman og palit og hotdog sa babaye, nibalik siya duol sa gilingkuran sa lalaki. Nitunol ang babaye sa sukli ngadto sa lalaki. Gidawat sa lalaki. Unya nitindog siya. Niagbay ang lalaki sa babaye nga nagkaon na og hotdog. Nanglakaw sila padulong sa gawas sa grocery section. Gisundan og tan-aw ni Rudy nga nagsigi nalang og tolon sa iyang laway. Ug may bombelya nga nisiga ibabaw sa iyang ulo.

"Ah! Nasayud na ko’g unsaon pagdiskarte si mama, aron makakaon ko’g hotdog" tuaw ni Rudy sa hilom.

Pag-abot sa iyang mama Rosa nga nagbitbit og duha ka plastic bag iyang kinompra ug human nakabayad sa counter, nagpaluyaluya dayon si Rudy sa iyang gilingkuran.

"Bitbita ring usa ka bag, Rudy" ni mama Rosa niya. Nagminghoy si Rudy. Niping-it.

"O nganong nagluya man ka?" ni mama niya.

"Labad lagi akong ulo" ni Rudy. Subo ang hitsura.

"Ha? Magsigi man god ka’g pasinguwan. Bisag magtaligsik na, magsigi gihapon ka’g panirador og langgam" ni mama niya. May pagmahay sa anak.

"Sigi, huwata ko kay magpalit ko’g paracetamol," ni mama niya. Gibilin ang ikaduhang plastic bag iyang gibitbit sa atubangan ni Rudy.

"Ay nalang ma. Agwantahon ko lang ang labad sa ulo," nitindog si Rudy ug nigunit sa kamot sa iyang mama.

"O unsa man lay imong ipapalit nako?" sa iyang mama. "Paliti lang ko’g tulo ka hotdog. Kana bitaw'ng hilantan, tagaan ma’g itlog ug orange. Ako palahi lang ko. Hotdog lay akong tambal sa labad sa ulo," ni Rudy nga papingoy-pingoy.

"Nahala. Naa pa man seguro tay aspirin sa balay. Adto na lang unya tomar sa ato. Paghulat diha kay magpalit ko’g hotdog" ni mama niya.

Nakaamgo sab seguro nga dugay nang panahon nga wa kakaon og hotdog iyang anak. Tingale, ma-Pasko ra gyud. Kasinggiton sa kalipay si Rudy. Nagpogong siya aron di mabistong inartista. (Katapusan)