Nahilom si Gordon.
“Ayaw na kini’g usba, ha,” ni Xenia pa. Kun di ka gusto nga isumbong ko ikaw sa imong asawa.”
Unya mitindog si Xenia. Migawas siya sa Jollibee. Gibiyaan lang niya si Gordon sulod sa maong kan-anan.
Pag-abot niya sa katedral, naabtan ni Xenia nga nanghipos na si Nanay Lourdes niya sa ilang mga gamit. Nahurot na diay og kahalin ang mga baligya nilang pagkaon. Gitabangan ni Xenia ang iyang inahan sa pagpanghipos sa ilang mga gamit aron makapauli na sila.
“Kadugay ba nimong mibalik?” gikan ni Nanay Lourdes.
“Sorry, Nay,” ni Xenia pa. “Dugay man gud kong nakapili og pocketbook nga paliton.”
Wala niya tug-ani si Nanay Lourdes nga nagkita sila si Gordon ug gidapit siya niini’g pangaon. Nakahukom si Xenia nga dili sab niya tug-anan ang iyang inahan nga nangulitawo si Gordon kaniya aron dili na kini magdaghan og pangutikuti.
Si Gordon nagpadayon sa pagpangulitawo kang Xenia. Basta makahigayon kini sa pagpakigsulti kaniya, modayon gayod kini’g sukna mahitungod sa gugmang gihalad niini kaniya. -- Sumpayan pa