Hinog sa punoan - Gula 82

Gi-reply niya ang text ni Patrick. Gipasalamatan niya ang lalaki sa nindot nga mensahe nga gipadala niini kaniya.

Wala madugay, mibagting na usab ang message alert tone sa iyang cellphone. Si Patrick gihapon ang nag-text. Iya kining gibasa.

Nag-ingon ang text message ni Patrick: “I believe n happy endings though I’ve only known a few; 4 as rare as dy r lyk a bryt falling star I have found one n u.”

Ginindotan si Urielle sa mga text message nga gipadala ni Patrick kaniya mao nga gi-save kini niya sa iyang cellphone. Makapila kini niya sublia-sublia pagbasa.

Nanihapon nga nag-inusara si Urielle. Wala na lang siya magpaabot kang Patrick kay nagpasidaan na man kini kaniya kaganinang buntag nga dili kini makapauli og sayo.

Human makakaon, gihipos niya ang iyang kinan-an ug pagkahuman miadto sa sala. Gibuksan niya ang telebisyon. Samtang nagtan-aw sa salida sa tv, gi-text niya si Patrick. Iyang gisusi kun nakapanihapon na ba usab kini.

Tuadtaod siyang nagpaabot apan walay midangat nga reply gikan kang Patrick. Miusab siya pag-text apan wala gihapoy reply gikan sa iyang bana. Giusban pa gayod niya’g text. Gi-send niya sa makadaghan ang iyang text apan wala gihapoy reply gikan kang Patrick. -- Sumpayan pa