Si Isyot nga palahubog
Sugilanon - Jenner S. Lobedica () - February 3, 2011 - 12:00am

San Remegio, Cebu

Hoy, Isyot! Buntag sayo pa naglala ka na nianang Tanduay. Malahob ug maluto gyod nang atay ug tinai mo. Maayo pa’g maligo ka ug mamahaw unya mosimba kay adlaw'ng Domingo baya karon. Basin na lang og makaluy-an ka sa Diyos lakip na ang atong pamilya," singgaak pa ni Toding samtang namahaw sila ug ang iyang duha ka mga anak kay mosimba sila ning adlawa.

Barbero si Isyot sukad pa sa iyang pagka-ulitawo kaniadto ug si Toding usab usa ka sastre kon mananahi sa mga bistida, blouse, shorts ug sayal sa kababayen-an.

Arang-arang unta ang ilang pagkabutang apan tungod lagi sa pagkapalahubog sa iyang bana ang iyaha ra gyong kinitaan ang klaro kaayo nga sarang ikasagubang nila sa inadlaw-adlaw'ng nilang panginahanglanon.

Nag-eskuyla sa elementarya ang duha nila ka mga anak. Tagsa ray adlaw nga si Isyot dili huslok kon hubog. Kun dili gani kauban niya ang iyang mga amigo ug mga barkada, magsolo nalang siya’g lala sama ning sayong kabuntagon.

Maayong motupi si Isyot basta dili makainom. Apan kun makainom gani daghan gyod siyang ikaaway o ikalalis ba hinuon kay mangakabang ug mangahibat man ang iyang pagkorte sa buhok sa iyang kustomer.

Dihay kausa nga gisuntok siya sa iyang gitupihan kay nasamad man ang tangkugo niini gumikan sa kahait sa iyang labaha apan wala matarong sa pagtrabaho kay nakainom man siya niadtong tungora.

Maayo gani kay nahilot ra kadtong hitaboa. Dugay'ng hubgon si Isyot kay taas na kaayo siya’g hangin kun inom na gani ang panagsultihan.

Usa ka adlaw, nawad-an og gana si Isyot sa pagkaon kay gibatyag na niya ang hilabihang kahapdos sa iyang baba sa atay.

Mao tong gidala siya ni Toding sa ospital. Ang findings kon ang resulta sa pag-eksamin sa doktor mahitungod sa iyang balatian mao nga nalahob ug naluto na ang iyang atay ug tinai gumikan sa daotang epekto sa bino.

Nasiril-siril intawon si Toding sa pagpangita og sapi alang sa pagpalit og tambal nga gireseta sa doktor sa iyang bana. Nabaligya gyod ang barberohan ni Isyot ngadto sa iyang kumpare nga si Binong gumikan sa iyang balatian nga ginaantos.

Pilay estorya, nakagawas si Isyot gikan sa tambalanan apan nasubo ug naguol siya pag-ayo kay gitagalan sa doktor ang iyang kinabuhi nga molungtad na lang og unom ka bulan gumikan sa dakong kadaot nga nahiagoman sa iyang atay ug tinai.

Masalbar unta siya kun aduna pa siyay igong sapi nga ikabayad sa usa ka espesyalistang doktor didto sa Manila apan pordoy siya lakip na ang iyang pamilya.

Nagbasol si Isyot sa hilabihan apan ulahi na ang tanan kay miabot na man ang gikahadlokang adlaw nga gitagal sa doktor kaniya.

Ug namatay gyod siya! Busa, dili maayo nga palabian nato ang bisyong inom dinhi sa kalibotan. Kun moinom man, okasyon lang. Di ba? (Kataposan)

APAN ARANG ISYOT IYANG KAY KUN MAAYO SAN REMEGIO SIYA
  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with