Hinog sa punoan

Gula 36

“Salamat, Urielle,” nagkanayon si Don Emilio. “Daghang salamat nga wala nimo pakyasa ang akong tinguha. Ipasalig ko kanimo nga dili ka magmahay niining nakab-ot mong desisyon.”

Apan sa kahiladman ni Urielle diha pa gihapon ang pagduhaduha. Wala gani siya makasabot kun nganong nahinayak siya sa pagluwat sa iyang hukom pagsanong sa tanyag ni Don Emilio. Kay sa iyang kaugalingon nagduhaduha pa siya. Wala pa siya makaseguro kun magmalipayon ba gayod siya sa pagpakigtipon unya niya kang Patrick. Alang kaniya, bakikaw kaayong hunahunaon nga makigminyo siya sa lalaki nga dili niya hinigugma.

Kun mahimo pa lang, bakwion niya ang naluwatan niyang hukom. Apan maikog siya kang Don Emilio. Tingalig masuko na unya hinuon kini kun mag-usab-usab siya sa iyang desisyon. Mao nga giubanan na lang niya’g pamahala ang iyang hukom nga magpakasal kang Patrick segun sa gustong mahitabo ni Don Emilio.

Dihang nakalakaw na si Don Emilio, migawas gikan sa kuwarto si Nang Marciana ug miduol sa nahimutangan ni Urielle sa sala.

“Nabati ko ang panagsulti ninyo ni Don Emilio, Urielle,” nagkanayon ang iyang inahan. “Gikalipay ko ang nakab-ot mong desisyon. Ug nakaseguro kong ikalipay usab kini sa imong amahan.”

Wala motingog si Urielle. Lawom ang iyang gihunahuna. Kun dili pa lang tungod sa dakong utang sa iyang mga ginikanan ngadto ni Don Emilio, dili gayod unta siya mosugot nga magpakasal ngadto kang Patrick. Si Nelson ang gusto niyang pakaslan. Pero tungod sa kaluoy niya sa iyang mga ginikanan, gisakripisyo niya ang iyang pagbati. Kini lang ang paagi nga maimpas ang utang sa iyang mga ginikanan ngadto ni Don Emilio Arcanghel. -- Sumpayan pa