Anino sa kulto

Gula 118

Diha na ang motorsiklo nga gisakyan sa kaaway. Kalit giablihan ni Carlo ang pultahan sa walang kilid sa awto. Maayong pagkadasmag sa motorsiklo sa bukas nga palid sa pultahan sa sakyanan. Napungag ang palid sa pultahan. Apan maayong pagkatikay-ang sa nagsakay sa motorsiklo sa taliwala sa karsada. Nahalagpot kini gikan sa motorsiklo.

Dihang mihana pagbangon ang tawo nga nagmaskara, nakapabuto si Carlo. Milit-ad ang kaaway nga naigo sa mga bala. Wala na kini makapabuto sa gigunitan nga Uzi.

Gidali ni Carlo pagkuha ang Uzi sa kaaway. Nagsingabot na ang motorsiklo nga gisakyan sa laing kaaway. Gipabuthan kini ni Carlo samtang midali siya pagbalik sa iyang sakyanan.

Gipadagan ni Carlo ang awto nga wala nay sera ang pultahan sa walang kilid. Gipusil siya. Gipaikis-ikis na usab niya ang awto. Tulin nga migukod kaniya ang motorsiklo nga gisakyan sa kaaway.

Nagpadayon ang ginukdanay sa motorsiklo ug awto. Sa pagsingabot ni Carlo sa usa ka eskina, nalantawan niya ang usa ka ten-wheeler truck nga hapit na molabang sa dalan. Gipahunat ni Carlo sa kataposan niining kusog ang makina sa awto. Mipabosina ang drayber sa dakong sakyanan pagkakita sa lugos niyang paglabang. Diriyot gayod masangit ang lubot sa iyang awto sa bamper sa trak de karga.

Apan unya, nakignat si Carlo. Nakadungog siya’g kusog nga lagubo. Sa panabang sa side mirror sa tuong kilid sa awto, nakita niya ang nahitabo. Maayong pagkabangga sa motorsiklo sa kaaway nga naggukod kaniya sa dakong trak de karga. Nabungkag ang motorsiklo.

Dali nga gipahunong ni Carlo ang awto nga iyang gimaneho. Nanaog siya ug mibarog duol sa sakyanan. Milantaw siya ug nakita nga naghunong na ang trak de karga. Didto sa taliwala sa karsada nagbuy-od ang lawas sa kaaway nga iyang gika-engkwentro. Naligo kini sa kaugalingong dugo ug sa iyang pagtuo, wala na kini kinabuhi. -- Sumpayan pa