Gula 35
“Pero, Sir, may hinigugma na ko. Ug may hinigugma usab si Patrick.”
“Wa nay problema si Patrick mahitungod sa iyang hinigugma. Sa gikaingon ko na, ang imo na lang desisyon maoy gusto kong madungog.”
Wala na usab makatingog si Urielle.
“Ayaw lang laina pagsabot kining gitanyag ko kanimo, Urielle,” namulong na usab ang lagas. “Ayaw isipa nga ikaw ang gihimo kong bayad sa nautang sa imong mga ginikanan kanako. Dili kana mao ang akong tumong. Nahiatol lang tingali ang tanan. Kun mosugot ka sa akong kondisyon, maimpas na ang tanang utang sa imong mga ginikanan kanako.”
Nagpabilin sa kahilom si Urielle.
“Ayaw na paghunahuna og bisan unsa, Day Urielle,” ni Don Emilio pa. “Ang angay mong hunahunaon sa pagkakaron mao kun andam ka ba pagdawat kang Patrick nga maoy imong mabana.”
Taudtaod nga naghinuktok si Urielle. Daghan ang iyang gihatagan og konsiderasyon sa iyang hunahuna. Hangtod nga nakakab-ot siya og hukom.
“Sige, Sir,” ni Urielle pa. “Mosugot na ko. Pakaslan ko ang imong anak.”
Nalipay pag-ayo si Don Emilio Arcanghel pagkadungog sa hukom ni Urielle. Nakita sa dalaga nga nahimuot kini pag-ayo nga misugot siya sa tanyag niini nga mamahimong asawa sa anak niining si Patrick. -- Sumpayan pa