Gula 4
“Wa ra ba sila karon dinhi, Sir. Tua sa uma. Malagmit unya pa kadtong hapon mopauli.”
“Diay ba?”
“Nga-ngano man diay unta, Sir?”
“Magpatabang unta ko’g pangita og tawo nga akong mapalihog sa pagkatkat sa lubi. Gusto ming mangaon og butong.”
“Aw, kana ra diay? Dili kana problema, Sir. Naa man ang akong manghod.”
“Maayo hinuon. Mamalihog ko’g sugo niya.”
Gitawag ni Urielle ang iyang manghod nga si Raymond. Kadali rang nahitungha si Raymond nga didto ra diay sa luyo sa balay.
“Kuhaig mga butong sila si Sir Patrick,” ni Urielle ngadto sa manghod.
“Oo, Ate,” ni Raymond dayong kuha sa sundang nga ang sakoban gibitay sa lansang nga nagtaop sa may haligi sa kayda.
Dihang milakaw na si Raymond paingon sa kalubihan, nananghid na si Patrick kanila ni Urielle ug Nelson.
“Daghang salamat, Urielle,” nagkanayon si Patrick.
“Way sapayan, Sir,” ni Urielle.
Milingi si Patrick ngadto sa babaye nga kuyog niini. Gisenyasan kini sa ulitawo nga mosunod sila kang Raymond ngadto sa kalubihan. -- Sumpayan pa