Walay sukod ang bawos

Nanglipaghong intawon sa tumang kauwaw ang dagway ni Ode, sa dihang gikataw-an siya sa iyang mga klasmet. Maayo man god niyang pagkahayang, sa dihang molingkod na unta siya sa iyang lingkuranan. Kay unsa ba diay nga kalit man kining gibira sa usa sa iyang mga klasmet nga si Harold.

Nagping-it pa usab ang iyang nawong samtang naghinayhinay siya sa pagbakon. Kay nabatyagan man usab niya ang kasakit sa iyang sampot nga maayo kaayong pagkadakdak sa sementadong sawog.

Nahilom lang sa pagpangatawa ang iyang mga klasmet sa dihang gibadlong sila sa ilang maestra nga si Miss Breana Bughao. Kinsa midali usab sa pagduol sa iyang nahimutang aron sa pagpabarog kaniya. Wala man guy bisan usa sa iyang mga klasmet ang mitabang kaniya sa pagpabarog.

Sa dihang gipangutana na ni Miss Bughao ang iyang mga tinun-an kun kinsa ang mibira sa lingkuranan ni Ode, wala gayu’y usa nga mitug-an. Nahadlok sab tingali kang Harold kay maldito ra ba kini kaayo.

Apan sa dihang gipugos na ni Miss Bughao sa pagpatug-an ang iyang mga tinun-an, ilabi na gayud kadtong naduol sa gilingkuran ni Ode, diha gayu’y usa kanila nga mitudlo kang Harold. Busa, wala maglangan ang maestra iya dayong gilusi ang usa ka dunggan ni Harold. Apan igo lamang kining mingisi ug wala lang baleha ang kasakit sa paglusi kaniya.

Bisan tuod sa dili maayong gibuhat kaniya ni Harold wala lang gayud mosumbong si Ode ngadto sa iyang mga ginikanan. Bisan pa gani ngadto sa iyang maguwang nga si Adrian nga diha ra usab magtungha sa maong eskuylahan.

Apan nag-alintabo pa gihapon ang iyang kalagot ngadto kang Harold. Tungod sa gibuhat niini ngadto kaniya. Gani, sa ilawom sa iyang dughan daling natawo ang usa ka panganti. Diha sa iyang hunahuna nga manimawos gayud siya kang Harold. Kana, kun makahigayon siya. Ang higayon lang unya maoy iyang agdon.

Usa ka hapon niana, gisugo sila si Ode sa ilang maestra sa pagpanglimpiyo sa tibuok nga bahin sa ilang classroom lakip na ang gawas nga bahin niini. Duna man guy physical evaluation inig ka ugma.

Aron madali ang ilang trabaho, gigrupogrupo sila sa ilang maestra. Dunay grupo nga maoy manglimpiyo sa sulod sa bahin sa lawak saringanan ug duna say laing grupo nga gidestino aron sa pagpanglimpiyo sa gawas nga bahin lakip na ang nataran niini.

Apan wala tipuna og grupo sila si Ode ug Harold. Si Ode, kauban ang pipila niya ka mga klasmet, maoy gidestino sa pagpanglimpiyo sa sulod nga bahin sa lawak saringan. Samtang sila si Harold, maoy gidestino sa pagpanglimpyo sa gawas nga bahin niini.

Samtang nanrapo si Ode sa usa sa mga bookshelves, iyang nasigpatan si Harold nga nanglimpiyo usab sa gawas nga bahin sa ilang room. Ginamit ang usa ka panapton nagsige usab og trapo si Harold sa gawas nga bahin sa bungbong. Tungod sa may bintana nga gitukoran lang og kahoy.

Mamatngunon kaayo nga miduol si Ode sa may bintana. Ug giusab niya sa pagpahimutang ang tukod niini. Iya kining gipaligas pagpahimutang aron nga kun matandugan kini mahulog dayon ang tukod ug masera dayon ang bintana. Human niya’g pahimutang sa tukod sa bintana mibalik dayon siya sa iyang gibuhat.

Wala madugay mikalit lang pagpaka ang sera sa bintana. Nahulog diay ang tukod niini kay natandungan ni Harold samtang nanglimpiyo siya sa gawas nga bahin sa lawak saringan.

Maayo gayud ang pagkaigo sa ulo ni Harold sa naserang bintana. Ug nasamad gayud kini. Dako kaayo ang samad sa ulo ni Harold maong ubay-ubay usab ang mga dugo nga miagas ug midagayday gani hangtod na sa iyang nawong.

Dali ra kaayong nagkapundok ang mga tinun-an ni Miss Bughao ug gialirungan si Harold nga nagkadugo. Hangtod nga nahiabot usab ang maestra nga hilabihang kuyawa tungod sa nahitabo.

Usa usab si Ode sa midugok kang Harold. Apan igo lang siya nga naghinan-aw niini. Wala gayud siya batia bisan gamay nalang nga kaluoy kang Harold. Nakaingon pa gani siya sa hilom. "Mirisi ka! Mao kanay angay kanimo!" (Kataposan)