Sa dihang makigkita na ang akong teksmet

Naminaw ko sa programa sa suod kong ig-agaw nga si JTY nga announcer sa radyo usa ka higayon niana. Gibasa niya ang mga greetings nga gipadangat sa mga tigpaminaw pinaagi sa teks. Naaghat ko pagteks kay wala man sad koy lingaw adtong higayona. Palabay ba lang sa kalaay. Akong giteks nga WANTED TXTMATE BBYE 40 ABOVE.

Wala madugay mitig-ik ang akong selpon. May nagteks. Akong gibasa ang INBOX: "Hi Mar ako c Emma pareha ra ta taga Lapu. Kdungog kos radio nangita kag textmate. Mitry ko bsin imo dwaton."

Naglibog ko. Pamilyado man god ko. Apan tungod sa kalayo sa akong pamilya unya ako nag-antos sa tumang kamingaw akong gikonsuylohan og tubag: "K frnd n ta Em."

Mitig-ik na pod ang akong selpon usa ka adlaw niana. Akong gibasa ang INBOX: "Hi Mar gd am. Msta?" -- Emma.

Giahak na. Nakatuaw ko sa akong kaugalingon. Ako na lang gitubag: "K lng miss u."

Nagsige na mig teksanay si Emma. Daghan pa ang mga nagteks nako ang gustong makighigala pero si Emma ray akong gilahutayan.

"Ulitawo p ka Mar?" Lain na sang teks ni Emma nako. Nakaingon ko nga 'ah, puslan man suwayan ta na lang gyod ning iring-iring!" Ni-response ko nga "May asawa na ko pro ngbuwag mi." Morag misulod na si Taning sa akong ulo.

Apan nahibulong lang kong Emma kay kun akong pangutan-aw kun hain man sa Lapulapu ang inyo?' di man motug-an. Moingon lang nga 'basta duol ra ta'.

Akoa na lang untang kalimtan si Emma pero kada adlaw moteks man gyod siya nako. Kinsay di makabig?

Usa ka gabii nga nangapkap kog mga pulong nga sarang ikawilikwilik sa puting aping sa bond paper, naigpot ko sa dihang mihuni na pod ang akong selpon sa kilid sa computer. Akong gibasa: "Hi mar vning msta n man k oi!" -- Emma.

Na-touched na man nuon ko aning bayhana. Ug kay wa pa man koy nahagdaw nga tema, nakahunahuna kong akong buhatag sugilanon ning among panag-teksmet. Ni-reply ko: "Em d mn gyd ko ka2g na-nluv man ko nimo. Ang akong lngit nga gidag-uman daw misanag nga nagkateksmet ta."

Mi-response siya: "Wow.... kblaknon nimo mar, ig-unsa nimo c mar mañus sr. ang banggiitang mgbblak diha sa basak-Iba u pa2?"

"Yap." Maoy akong tubag. Unya akong gisundan og message nga ''cge Em til nxt time kay magsuwat p kog s2ry. Gd nyt."

"Owkie! Gdnyt!" mi-response pa gyod siya.

Gihimo ko na lang untang lingawlingaw ang pagpakigteksmet kang Emma kay mopasulabi gyod sa akong hunahuna ang akong pamilya. Apan usa ka buntag niana misiyagit ang akong selpon nga akong gipatong sa ibabaw sa TV samtang nanglaba ko. Nagtuo ko nga ang akong waswet ang nanawag aron mangutana kun nasuweldohan na ba ko. Apan...

"Hello.... kinsa ni?"

"Hi, Mar ... morning ... si Emma ni. Nag-unsa ka ron?" Bangas ka! Nakatuaw ko.

"A, Em, nanglaba ko." Nakabig ko. "Paita lagi aning wa tay partner, uy."

"Kining, Mar, human mog laba magkita ta sa gawas sa Gaisano Island Mall sa Pajo. K? Bye." Ug gisundan pa gyod niyag text message nga "Una lng dd2 mga 3pm."

Didto sa gawas sa Gaisano Island Mall naglingkod ko sa lingkoranan nga haduol sa may fountain. Sige kog lingilingi kun duna bay babaye nga masabtan ta nga mora sag dunay say gipangita. Apan wa man gyod koy namatikdan. Unya pagkataudtaod dihay lalake nga miduol nako. Bagtok ra ba kaayo’g lawas, daghag patik.

"Brod, nagpaabot kang Emma?" Isog ang tingog sa lalake.

"Ki-kining, o, Brod. Mag-agaw man god mi ug nagsabot ming magkita dinhi kay patabang siya’g dala sa iyang pamaliton." Kalma ang akong tingog apan wa ko magpasabot nga miaksyon na ko’g kurog.

Mitupad siyag lingkod nako unya may gikuot siya sa iyang bulsa. Selpon!

"Mag-agaw?" Misamot kagahi ang iyang tingog. "Dili kaha mo magkinabaw?" Unya mipadayon siya, "Brod, ikaw si Mar no?" Ug iyang gipislit-pislit ang selpon. "Kining selpona, Brod, kang Emma ni. Pagkadaghan baya sa mga teks dinhi nga 'Mar' ang sender. Ug duna pay message sent ni Emma nga magkita mo dinhi's Gaisano 3pm. Porbida bag-uhay pa ra ba gyod kong nakagawas sa 'rehas na bakal', Brod!" Puwerte nang isoga sa lalake. "Akoa tawong asawa na's Emma, Mar, uy!"

Wa kog maglangan. Misirit ko morag kabayo nga gisilian ang lubot. Mitabok dayon ko's karsada ug misakay'g multicab para TAMIYA. Mipauli ko's Basak-Iba. Unya sa akong hunahuna nakatuaw ko: "Mao diay'ng sa sinugdan wa gyod mosugot si Emma nga magkita mi. Ug wa sad gyod motug-an kun diin dapit sa Opon ang ila!" (Kataposan)

(MORAL LESSON: Ay'na lagi mo anang textmate2 kun minyo mong dako!)