Pagkapikas sa nagkatakdong kasingkasing

Mihunong ko sa pag-ayo sa gubang makina gumikan sa nadungog kong tawag. Miarko man gud sa kinatibuk-ang dapit sa MYM Enterprises nga ako karong gitrabahoan ang kusog nga tingog sa 'Paging System' nga nag-aghat kanako sa pag-adto sa opisina. Busa milakaw dayon ko aron tumanon kini. "Good morning, Sir!'' Nako pa dihang miabot na ko sa opisina sa among manedyer nga maoy mipatawag nako.

"Good morning!" Tuaw niya dayong agda nako sa paglingkod sa bakanting lingkoranan nga nahimutang sa kilid sa iyang lamisa.

"Naguba ang makina nga giabangan sa atong kliyente ug ikaw maoy napili kong ipadala didto aron moayo niini. Kuhaa karon dayon ug dad-a ang mga hiraminta nga sarang mong magamit didto kay nagpaabot na kanimo ang atong sakyanan nga maoy mohatod nimo didto!"

Human sa pipila ka gutlo nga biyahe, nahiabot ko sa kompaniya nga giingon sa among manedyer. Ug dala ang bag nga gisudlan sa mga hiraminta, nanaug dayon ko sa sakyanan ug misulod sa bukas nga pultahan sa edipisyo nga gipanag-iya sa kliyente sa gitrabahoan kong kompaniya.

"Ikaw ba ang mekaniko nga gipadala dinhi?" Usa ka maanyag nga babaye ang misugat nako. Dihadiha nabatyagan kong daw gilamat ko samtang nagtan-aw sa babaye nga nagpahiyom ngari kanako. Unya mao na lay akong naamgohan nga mitubod na ang akong laway ilabi na dihang nasakpan sa naglupad kong panan-aw ang puti niyang paa. Miamag ang kahamis niini kay bulok itom man ang mini-shirt nga iyang gisul-ob. Nahulma pa gayud sa tumang kalalim ang iyang lawas ug dughan.

"O.... A-Ako, misss.." Nagkabungabunga ko nga namulong ngadto sa babaye nga niining higayona mitutok sab nako. Miyango ko agi’g pagtangdo. Unya, "Ako diay si Rey Aman!"

"Ako sab si Maricel Cabasa. Ako ang gitugyanan sa among labaw sa pag-atiman nimo samtang nia ka pa dinhi!" Niya pa dayong dawat sa gitunol kong tuong kamot. Unya gidala dayon ko niya ngadto sa sulod sa edipisyo diin didto mahimutang ang guba nga makina nga maoy akong ayohon.

Samtang nag-ayo ko sa gubang makina nagpadayon usab ang panagsulti namo ni Maricel. Bisan unsa na lamang ang among tima nga usahay mopagitik og mopakatawa usab namong duha. Pag-abot sa tingpangaon nagkuyog usab kaming duha ngadto sa kantina ug nagsalo sa pagpangaon. Wala na lang gani namo maalinggati nga may mga trabahante sa among duol nga nagtan-aw kanamo.

Mao kadto ang sinugdanan sa among panagsuod ni Maricel. Hangtod nga miabot gayud ang adlaw nga magkatakdo ang among mga kasingkasing. Nagkahigugma kami!

Usa ka adlaw niana, mitawag kanako si Maricel sa tingog nga ingon og sa naghilak. Mihangyo siya nako nga makigkita ug wala ko siya balibari. Maoy iyang gusto nga mag-abot mi sa usa ka dapit nga walay laing tawo gawas lamang namong duha.

"Nasayran ko na ang matuod mong pagkatawo, Dong Rey!" Pagaw ang tingog ni Maricel nga namulong dihang nag-abot na kami sa gikasabotan namong lugar. Dihay gilaw sa mga luha nga nanag-ilogay sa pagpanailos sa iyang mga mata.

"P-Pasayloa ko, Day Maricel kun ugaling sala man ang akong paghigugma nimo. O, angkonon ko nga minyo na ko apan wala koy gugma sa akong asawa. Napugos lamang ko sa pagpakasal kaniya! Diha ko lang kanimo mabatyagi ang matuod nga gugma. I-ikaw ang matuod kong gimahal, Day Maricel ug andam kong makig-uban nimo sa tibuok kong kinabuhi. I love you very much!" Nagtibi ang akong mga ngabil nga nagpakiluoy kang Maricel. Apan daw huyohoy lamang kini og wala gayud makapatandog sa iyang desisyon.

Ug nahugno ang akong kalibotan dihang nakita ko siyang mitalikod ug mipalayo kanako. Dihadiha mihilak ko sa tumang pagmahay kay alang kanako siya lamang gayud ang bugtong tag-iya sa akong kasingkasing ug kalag. Apan wala na koy mahimo. Tugotan ko nalang siya nga mopahilayo kanako ug pasagdan nga magkapikas ang nagkatakdo na unta namong mga kasingkasing! (Katapusan)