Samtang namusil og mga langgam si Ronaldo sa bukiran sa Naga, nakapunit siya og usa ka kuwentas nga may locket. "Kuwentas nga gold," nakatuaw siya sa kalipay. "Ako ning iregalo sa mahal kong asawa."
Pag-abot ni Ronaldo sa balay, "Ronaldo, ika-singkuwentang anibersaryo naman diay nato karong adlawa, wa ka bay regalo nako?"
"Suwerte gyud, mahal kay may regalo ako nga bisan pinunitan ko, gold ug antique pa. Nia, ikuwentas," dayong tunol niini sa kuwentas.
"Kanindot ining kuwentasa, Dong, ug may locket," dayong abli sa locket. Diha-diha, kalit nga miaso ang kuwentas ug may migawas nga fairy. Nagsayawsayaw ang fairy sa kalipay.
"Ahaay! Salamat ninyong duha kay inyo kong gipagawas gikan sa akong pagkabilanggo sulod sa usa ka gatus ka tuig diha sa locket. Duna koy premyo ninyong duha."
"Unsa man?" nangutana ang asawa.
"Mohatag mo og tagsa ka "wish" ug matuman kana. Ikaw una ang mauna, asawa."
"Gusto kong malibot ang tibuok kalibotan kauban ang mahal kong bana."
Mikompas dayon ang fairy sa iyang magic wand ug migawas ang duha ka first class ticket sa Jombo Jet, alang sa ilang round the world tour.
"Ikaw na sab, bana, pagdali kay gusto ko nang maglakuwatsa kay usa ka gatos ka tuig kong nabilanggo. Unsay wish, mo bana?"
Wa dayon makatubag si Mister kay ang gusto niyang wish, mao nga ang kauban niya sa tour, matahum, seksi ug bata kay niya og 30 ka tuig. Apan mahadlok siyang mosulti kay mahiubos unya ang iyang asawa.
"Sige na kay nagdali ko," nag-apura ang fairy.
"Ang gusto kong ikauban paglibot sa kalibotan ang babayeng mas bata nako og 40 ka tuig." Duna pa unta siyay idugtong apan mikumpas na ang magic wand, dayong pahawa sa fairy aron maglakuwatsa.
Sanglit 60 anyos na sila pareho, diha-diha nahimong usa ka gatus ang panuigon sa bana aron matuman ang wish niya nga mas bata og 40 anyos ang babayeng iyang makauban.
Tungod sa pagdinalidali sa bana ug ang fairy usab gusto na nga makalakuwatsa, sayop ang nahatag nga wish. (Katapusan)