Anino sa adlaw

Gula 54

“Timaan kini nga naglisod na ang mga rebelde sa bukid mao nga nananom na sila’g marijuana sa kabukiran aron ang halin niini ilang magamit sa ilang survival,” nagkanayon si Lt. Col. Jeffrey Andam sa dihang nahinabi sa tulumanon ni Ricky Liwanag sa DyTM.

Paglabay sa usa ka semana, laing hut-ong sa walhong pundok ang mipaulbo sa usa ka passenger bus nga gipanag-iya sa usa ka Tsinoy. May mga pasahero sa bus nga nangaangol atol sa maong hitabo. Namatay gyud ang driver sa bus.

Sumala sa report, gipaulbo sa mga rebelde ang maong bus gumikan sa pagdumili sa tag-iya niini paghatag sa gipangayo nilang revolutionary tax. Sa maong hitabo, nakaani og pagsaway ang mga rebelde gikan sa kagamhanan.

Sa laing bahin, ang pundok sa mga walhon nga gipangulohan ni Kumander Abay mihimo og sagunson nga pagpangatake. Una nilang gisulong ang detachment sa mga army sa barangay Kugitahan. Giatol nila ang pag-atake nga diyotay ray mga army nga nahibilin sa detachment kay ang uban nagpatrolya.

Milampos sila. Nakapatay sila’g mga army ug nakasakmit og mga armas ug ingon man mga bala. Nanigom sila’g mga armas isip kabahin sa ilang pagpangandam sa gilantawan nilang mas grabeng panghitabo sa umaabot. Tipik usab kini sa ilang tinguha sa pagpalig-on og balik sa ilang pundok nga naglihok sa kabukiran. -- Sumpayan pa