Kalingawan Anino sa adlaw

CEBU, Philippines - Sa misunod pa gyud nga gabii, lain na usab nga anomalosong mga proyekto sa mayor ang gituki ug gibutyag ni Ricky sa iyang tulumanon sa radyo. Ang labing bug-at nga issue mao ang gi-overprices usab nga computer units nga gipalit sa munisipyo. Dokumentado ang tanang mga isyu nga gituki ni Ricky sa kahanginan busa may lig-on siyang basehanan sa pagpadayag sa hait niyang mga komentaryo batok sa mayor.

Paggawas ni Ricky sa estasyon sa radyo human sa iyang programa, midiretso siya’g pauli sa ilang pinuy-anan. Matag karon ug unya mosil-ip siya sa side mirror sa motorsiklo nga iyang gisakyan aron pagsuta kun wala bay nagsunod kaniya. Giduble niya ang iyang pag-amping sukad niadtong pakyas nga pag-ambush kaniya sa wala mailhing mga tawo. Nasayod siyang daghan ang nagtinguhag daotan sa iyang kinabuhi.

Abli ang pultahan sa balay sa iyang pag-abot. Apan nagngiob ang sala. Gipasiga niya ang suga. Ug nakugang siya sa iyang nakita.

Maoy misugat sa panan-aw ni Ricky Liwanag ang dugoang mga lawas sa iyang mga ginikanan nga nangligdas sa salog. Nahugno si Ricky sa iyang nakita. Midali siya pagduol sa ilang nahimutangan. Nasuta niya nga wala nay kinabuhi ang iyang mga ginikanan. Wala kapugngi ni Ricky ang paghilak. -- Sumpayan pa