Leonora of my dreams

Ang gugma ni mama, dili ug dili tupngan. Sa tanang bahandi dinhi ning kalibotan. Ang tanan mahanaw, ang tanan may katapusan. Ang gugma ni mama hangtud sa kahangturan."

Usa kini ka matagming ug maanindot nga tingog ang madungog sa mamingaw nga alas dose sa kagabhion. Tingog kini ni Elena didto sa iyang payag nga nag-inusara sa ibabaw sa bungtod. Wala kini silingan sanglit mibalhin sa ubos ang duha niini ka silingan sukad nila madungog ang tingog ni Elena sa lawom nga kagabhion.

Kapin na sa tuig nga patay si Elena. Namatay kini kauban sa iyang inahan nga iyang gitabang nga nalumos sa baha sa sapa ubos sa ilang payag. Walay nangahas pagtugaw sa payag ni Elena sukad nga nadungog ang iyang tingog.

"Pareng Bestre, pila na ka gabii nga wa ko kadungog nga may mikanta sa payag ni Elena," matud ni Tibo.

"Bitaw Pre, bisan ako nakamatikod nga wa nay nagkanta sa payag."

"Naa na may nagpuyo nga ulitawo nga gikan sa Manila," misagbat si Ebyong. "Didto ako sa tindahan ni Leonora sa dihang mipalit og gas ang ulitawo," padayon ni Ebyong. Hinigugma kono na ni Elena didto sa Manila ug mianhi na kay magpakasal na sila."

"Unsa may hitsura anang ulitawo?"

"Guwapo siya ug maayong mobinisaya kay dugay kono siya sa Bohol kay didto maminyo ang iyang igsoon."

"Wa siyay gikahibudngan?" pangutana ni Tibo.

"Sa unang gabii sa dihang nadungog niya ang kanta, iya konong gipakigsultihan si Elena. Nagpakita kono si Elena ug mihangyo nga kun magminyo siya og taga dinhi, anhi sila puyo sa payag ni Elena ug wala nay makadungog sa iyang tingog.

"Sukad niadtong gabhiona, wala nay makadungog sa kanta ni Elena. Ug dunay mga sulti nga dili magdugay magminyo kanang ulitawo dinhi."

"Kinsa man sab kono ang pangasaw-onon nianang lakiha sa ato?" nangutana si Bestre.

"Kinsa pa man diay...," daling tubag ni Ebyong, "di si Leonora."

Duha ka bulan ang milabay, gikasal sila si Dante ug Leonora ug didto sila puyo sa payag ni Elena.

Sukad niadto madungog na sa sayong gabii ang tingog ni Dante sa payag ni Elena nga magkanta duyogan sa iyang asawa nga si Leonora og...

"Leonora of my dreams." (Kataposan)