Idlas ang katumanan sa gugma

Seryoso ang panagway ni Rev Florentino nga nakig-atubang kang Lonia. Dihang nakalingkod na siya sa silya, mitindog si Rev ug mipaingon sa nahimutangan sa steel cabinet. Gibira niini ang usa sa mga drawer ug gipagawas ang duha ka folder nga may mga papel nga gipalup-itan sa sulod.

Mibalik si Rev sa lingkoranan niini ug gitunol ngadto kang Lonia ang duha ka folder nga gibitbit niini. Ang maong mga folder mao ang gibutangan niya sa manuskrito sa duha niya ka nobela nga iyang gi-submit kagahapon. Giuli kini sa editor kaniya.

“U-unsay buot ipasabot niini?” May kahikugang nga miubay sa pagpangutana ni Lonia.

“I’m sorry, Lonia,” nagkanayon ang editor. “Pero akong gi-reject ang mao mong mga nobela.”

“S-sa unsang katarongan?”

“Tungod kay wala kini makapasar sa atong editorial standards. Una, success stories ang in demand karong panahona. Apan kining duha ka mga nobela wala makatuman sa maong lagda. Dili kini happy ending. Ikaduha, wala na mosubay sa imong storyline ug kini ang nakaguba pag-ayo sa estorya.”

“Pero igo ko lang gihulagway diha ang matuod nga mga panghitabo sa kinabuhi sa tawo karon. Dili nato ikalimod nga daghang mga tawo karon ang naghilak tungod sa kapakyasan.” -- Sumpayan pa