Ratatat! Bang! Bang! Hagba ang duha ka sikyu sa bangko sa dihang nadiskatahan nga miibot sa ilang armas. “Tana! Dali! Tingali'g hiabtan ta sa mga parak," ni Gido pa nga maoy lider sa grupo.
Milampos sila. Ug daghan pang tulis ang ilang nahimo. Naglabad ang ulo sa mga kapolisan. Si Derek maoy tig-plano kun duna silay target. Apan kun motrabaho siya, mag-inusara lang ug wa gyud masakpi.
"Bay," matud ni Gido, ang notadong tulisan sa Mindanao, "mag-partner ta o joint venture."
"Di ko gustong motrabaho, Bay, nga may kauban," tubag ni Derek.
"Ayaw lang pagkuyog, Bay, ikaw lang ang tig-plano!
"Okay, deal. Sugdan nato ugma."
"Way lihok," matud sa sakop ni Gido, "tulis ni," nanghapa ang tanan nga didto sa sulod sa bangko.
Dihay kliyente nga magtiayon nga mao pay paggawas gikan sa CR, natarantar ug naka-siyagit.
"Ratatat! Bang! Patay ang girakrakan ni Gido.
Didto sa ilang hide out. "Dili ba nagkasabot na man ta nga kuwarta lay atong kuhaon -- apan way patay?" matud ni Derek.
"Unya unsay gusto mo?" pinasingka ang tubag ni Gido.
Nagpugong na lang si Derek sa iyang kalagot. 'Tan-awon ta asa kutob ang imong diskarte," matud ni Derek sa kaugalingon.
Usa ka gabii niana, "Gipatawag ko kamong tanan kay may bag-ong plano si Derek," matud ni Gido. "Kun molampos kita niini, minilyon nga dolyares ang atong mahipos. Sa kadako niining atong proyekto, kini na ang katapusan natong tulis, kay mamahulay na ta."
Sigon sa plano ni Derek, giatangan nila ang armored van nga gikargahan sa kuwarta. Sa dihang miabot na, "Para! Check-up lang ni Sir," matud sa naka-uniporme og SWAT, "Ablihi ang likod, dali!"
"Wow! Kadaghang kuwarta ini," nahasiga ang mga mata ni Gido, nga miposas dayon sa driver. "Pulihi dayon ang driver," matud niya sa iyang sakop. "Sa hide-out ta, dali, paspasi."
Pag-abot sa hide-out, didto si Derek, nagpaabot. Pagkanaog ni Gido, giti-onan dayon siya ni Derek, dayong panggula sa mga pulis nga nagtago.
"Unsay buot ipasabot niini, Derek?''
"Nga katapusan mo na Gido, ang gika-intapang tulisan sa Mindanao," matud ni Derek. "Usa ako ka under-cover police agent sukad lang sa akong pagtapon sa imong grupo," dayong posas niini kang Gido.
Karon si Derek usa na ka SPO4 Deretso Y. Areglo. (Kataposan)