Nalangan nga kabuntagon

Gula 93

Apan si Evan kaha? Unsa man kaha ang gibati ni Evan alang kaniya? Gibati usab kaha ni Evan ang samang pagbati nga iyang nabatyagan ngadto niini?

Buntag sayo. Diha si Destiny sa hardin sa lapad nga lagwerta sa ilang balay. Nalingaw siya sa pagpanakop sa mga alibangbang nga naniba sa bulak sa mga tanom.

Mihunong siya sa iyang gibuhat dihang miduol si Evan kaniya.

“Ako na lay manakop og mga alibangbang alang nimo,” ni Evan.

Wala siya motingog. Gitan-aw niya ang naglupad-lupad nga mga alibangbang.

‘Buanga ‘sa,” ni Evan pa. “Wa gyud ko magdahom.”

“Sa unsa?” Wala motan-aw si Destiny sa ulitawo.

‘Nga dili diay ta matuod nga managsuon.”

Wala siya motingog. Gikawhat niya ang alibangbang nga miagi sa iyang tungod.

“Maayo ra sab,” ni Evan pa. “Aron dili ta baliwon.”

Wala gihapon motingog si Destiny.

“Andam ka na bang magpakasal nako?” Sukit ni Evan.

“Naunsa ka diha?” Sikmat ni Destiny. “Kay nangulitawo ka na ba diay nako? Nagkauyab na ba diay ta?”

“Gikinahanglan pa ba gud na?”

“Siyempre. Aron pormal.”

“Aw, sige gud.” -- Sumpayan pa