Gula 105
Wala madugay ang relasyon namo ni Davis. Nabuking sa iyang asawa ang iyang pagpakabuang nako. Nakigkita gyud nako ang iyang misis ug mihangyo nga likayan na nako ang iyang bana. Wala ko’y plano nga gub-on ang pamilya ni Davis maong ako na siyang gilikayan.
Dili unta mosugot si Davis nga bugtoon na namo ang among relasyon apan wala siya’y mahimo. Wala ko na siya hatagi’g higayon nga makaporma nako. Sa makadaghang higayon mihangyo siyang makigkita nako pero gibalibaran ko na siya. Dili na ko motubag sa iyang mga tawag sa cellphone. Dili na ko mo-reply sa iyang mga text.
Sa laktod, gitapos ko na ang tanan tali kanamong duha.
Nanglabay ang daghang mga adlaw. Usa ka higayon niana, nag-shopping ko sa Ayala. Sa akong pagpauli sa Talisay sakay sa Crosswind nga ako nay nangunay sa pagmaneho, nihiyos ang ligid sa sakyanan samtang nagsubay ko sa Natalio Bacalso Avenue.
Gibati ko ang tumang kapikal. Naproblema ko bahin sa pag-ilis og ligid sa sakyanan. Maglisod ko sa paghimo sa maong buluhaton. Taudtaod gyud kong nagbarog sa daplin sa dalan duol sa akong sakyanan. Nagpaabot ko nga adunay mahiagi nga puydeng kapangayoan nako’g tabang ug mapalihog pag-ilis og ligid sa sakyanan. -- Sumpayan pa