Nalangan nga kabuntagon

Gula 58

Unya, takulahaw lang, nahinumdom siya sa gisulti ni Kuya Evan niya.

Gusto kong makigrelasyon sa babaye nga tinuod nakong gihigugma.

Niini, nakapamalandong si Destiny. Dili kaha tungod kay wala man gayod siya mahigugma kang Devin maong wala siya’y kalipay sa ilang relasyon? Nakasukot si Destiny sa iyang kaugalingon.

Nagsugod na ang klase sa second semester.

Busy na usab sila si Destiny ug Evan sa ilang pagtuon. Si Evan hangtod sa alas nuybe sa gabii ang klase. Si Destiny hangtod ra sa alas siyete sa gabii, apan tungod kay may mga higayon nga mag-duty na siya sa ospital, dili kalikayan usahay nga kaadlawon na siyang makapauli.

Sa hilom gi-surveillance ni Destiny si Evan. Mangutana siya kang Nang Nema kun sayo bang mopauli ang iyang maguwang gikan sa eskuylahan ilabi na sa panahon nga mag-duty siya sa ospital.

Nahinangop si Destiny sa gibalita ni Nang Nema nga mopauli na diay og diretso si Evan sa apartment nga ilang gipuy-an human sa kataposang klase niini nga matapos sa alas nuybe sa gabii. Wala na usab makamatikod si Nang Nema nga magdala og babaye si Evan sa apartment. -- Sumpayan pa