Ang Impiyerno ni Belen - 2

Gula 75

Pagkilab sa pipila ka gutlo, ingon sa nikalit lang og karomantiko ang higayon. Kami si Roger nagpaanod sa bul-og sa among mga pagbati. Nahitabo na usab ang mainiton nga lawasnong panagtagbo.

Hapit na motikyop ang kangitngit dihang nanggawas mi sa hotel. Nanihapon mi sa Sayas. Pagkahuman, namalik na mi sa hotel nga among gitsek-inan. Ug sulod sa among hotel room, wala’y pagkapuol nga gitagay namo ni Roger ang lawasnong kalipay.

And we spent the whole night making love!

Pagkabuntag, unang nakamata si Roger. Nakahuman na siya’g kaligo sa dihang nahigmata ko.

“Unsay gusto mong kan-on sa pamahaw?” Gipangutana ko ni Roger.

“Ikaw nay bahalang mopili,” nako pa. “Sutaon ko kun makuha ba nimo ang akong taste sa mga pagkaon.”

Gipunit ni Roger ang awditibo sa telepono ug nanawag sa room service. Mi-order siya’g pancake, chocolate (hot), fried egg, yogurt ug coffee (very black).

“Gusto kong masayod, Roger,” nako pa samtang nagpaabot mi sa gi-order namong pagkaon.

“S-sa unsa, Belen?” Misukit si Roger.

“Kun seryoso ba gyud ka sa imong gi-propose nako.” -- Sumpayan pa