Ang Impiyerno ni Belen - 2

Gula 68

“Kalit ang akong hukom maong wa na ko makapahibalo nimo. Na-PUK sab ang akong SIM maong dili na kini makontak. Nag-ilis na ko’g SIM.”

Sa kadugayan, akong namatikdan nga inanay’ng nakombinser si Galen sa akong gisulti. Wala na siya manguti-kuti nako.

“Magkita ta ugma sa naandan natong tagboanan, Belen,” gihagawhaw ni Galen ang maong mga pulong. “Gimingaw na ko nimo.”

“Gimingaw o gihidlaw?” Gisukna ko siya.

“Pareho ra nang duha. Ang kamingaw ug kahidlaw usa ray tambal.”

Pagkaugma, gipakigkitaan gyud nako si Galen didto sa naandan namong tagboanan-- ang kamalig sa fishpond. Paghugpa sa kilumkilom mihinok ko’g biya sa balay ug miadto sa maong dapit.

Nag-una na diay si Galen nako didto sa among tagboanan. Sa akong pag-abot, iya dayon kong gigakos ug gikupogan paghalok. Nahisama siya sa usa ka gutom nga liyon nga nalutas sa kinaham nga pagkaon sulod sa dugay’ng panahon.

Nag-sex dayon mi si Galen.

Tugob sa kainit ang lawasnong panagtagbo namo ni Galen. Namatikdan kong agresibo kaayo si Galen. Mas hangol siyang miangkon sa akong pagka-babaye karon kay sa nangagi namong pagtagay sa lawasnong kalipay. -- Sumpayan pa