Gula 42
“Maglagot ra ba gyud ko nianang tawhana, da. Hambogero kaayo.”
“Pasagdi lang gud na siya. Unsaon, duna man gyu’y tawo nga huwabon.”
Wala motingog si Destiny. Nagpangusmo siya sa kalagot. Supak gayod sa iyang kabubut-on nga ibuya siya sa ilang mga ginikanan ngadto ni Greger. Wala siya makagusto sa maong lalaki. Wala gayod siya’y pagbati bisan gamay ngadto niini.
“Atubanga lang siya, Sis,” matud ni Evan. “Pakigsultihi. Sakay-sakayi lang gud. Respetari aron dili masuko si Daddy.”
Aron walay gubot, napugos si Destiny sa pagpakig-atubang ug pakigsulti kang Greger.
“Kumosta ang inyong pagtuon?” Sukit ni Mr. Sebastian Galasi nianang pagkabuntag sa ila nang pagpamahaw.
“Maayo man, Dad,” hapit magdungan pagtubag sila si Destiny ug Evan.
“Maayo hinuon kun mao kana,” nahimuot si Mr. Galasi.
“Sa sunod semana, Dad,” ni Evan pa, “mobalik na kami sa siyudad aron magpa-enroll alang sa second sem.” -- Sumpayan pa