Nalangan nga kabuntagon

Gula 12

Kalit lang misurok ang dugo ni Destiny. Giuli niya ang gigunitang libro ngadto sa iyang gikuhaan niini nga bookshelves. Migawas siya sa library samtang wala pa siya makita nila ni Evan ug Liz.

Pagkagabii, dugay nga mipauli si Evan. Sila na lang si Destiny ug Nang Nema ang nagdungan pagpanihapon. Nahuman na lang si Nang Nema sa gikuri-kuri niini sa kusina, wala pa gihapon mahiabot si Evan. Mibati na’g kalagot si Destiny. Misantop sa iyang hunahuna nga nakighugoy-hugoy na usab tingali ang iyang maguwang uban kang Liz.

“Katulog na lang, Nang Nema,” giingnan niya ang lagas. “Ako na lay magpaabot ni Kuya.”

Mitando ang lagas dayong sulod sa lawak­ — katulganan niini nga nahimutang dapit sa kusina.

Sa sala, gihulat ni Destiny si Evan. Gibuksan niya ang tv apan wala siya’y nagustohan nga salida. Gipalong na lang niya kini. Maoy gikalingawan ang computer. Nagduwa siya sa computer aron pagpukan sa kalaay samtang naghulat sa pag-abot sa iyang maguwang.

Lapas na sa alas diyes ang takna sa kagabhion sa paghiuli ni Evan sa apartment nga ilang gipuy-an. Daw sa nakugang kini pagkakita kaniya nga naglingkod atubangan sa computer diha sa sala.

“Wa ka pa diay matulog, Sis?” sukit ni Evan. -- Sumpayan pa