Nalangan nga kabuntagon

Gula 10

Hangtod sa naulitawo ug dalaga na sila, nadala ang maong kinaiya. Gusto niya nga ang atensiyon ni Evan anaa ra kaniya. Lakip gani sa pribadong kinabuhi sa iyang maguwang, partikular na sa lovelife niini, ingon sa gusto pa siyang manginlabot. Mao nga magselos si Destiny kun makigrelasyon si Evan sa laing babaye. Kun ang iya lang pagbuot maoy masunod, dili siya buot nga magbaton og uyab si Evan. Dili siya buot nga may kabahin siya sa pagmahal ni Evan kaniya. Gusto siya nga siya ray mahalon sa iyang igsuon.

Sa kantina sa unibersidad nga gitunghaan ni Destiny, nagkita sila si Devin human sa ikaduha niyang klase. Si Devin dugay nang nangulitawo kaniya apan hangtod karon wala pa gayod kini niya sugta. Wala man gud siya’y pagbati bisan diyotay na lang ngadto sa ulitawo.

“Wa pa ba gihapon koy paglaom, Destiny?” Sukit ni Devin nga ligdong kaayo og panagway nga miatubang kaniya. “Siyaro na man sab kun wa gyud koy mapaabot sa kapin na sa duha ka tuig nakong pag-antos.”

“Gikasubo ko, Devin,” ni Destiny pa. “Pero wa pa gyud masud sa akong bokabularyo kanang gugma-gugma.”

“Nganong di ka man mosuway?” sa lalaki pa. “Nindot baya kun may inspirasyon ka sa pagtuon.”

“Duna na man koy inspirasyon, ba.”

“H-ha? K-kinsa man?”“

“Ang akong mga ginikanan. Ug si Kuya Evan.” -- Sumpayan pa