Gikasilagan ko ang kalibotan

Gula 71

Si Roy midali pagduol kang Sonia.

“Salamat nga miabot kamo, Roy,” ni Sonia pa.

“Dili mahitabong pasagdan tika, Sonia,” matud ni Roy. “Wa ka ba maunsa?”

“Way daotang nahitabo kanako,” matud ni Sonia. “Apan kun wala pa kamo mahiabot, hayan may gibuhat nang daotan kanako si Ethan.”

Gimandoan ni Roy ang mga kauban niyang polis sa pag-ugkat sa patay’ng lawas ni Ethan Herra. Unya nanggawas na sila sa studio. Nagsunod sila si Sonia ug Roy sa mga polis nga nagbaswat sa patay’ng lawas ni Ethan.

Sa presinto sa kapolisan...

“Giunsa ninyo pagkasayod nga si Ethan ang nagpatay ni Helen Ogmoc ug ingon man kang Ninez nga burikat?” Nangutana si Sonia kang Roy.

“May usa ka concern citizen nga nanawag namo,” tug-an ni Roy. “Nagpaila lang nga usa siya ka silingan ni Ethan Herra. Mitug-an siya kanamo sa iyang napanid-an bahin kang Ethan. Maong naghimo dayon kami’g surveillance.”

“Diay ba?”

“Tuod man, namatud-an namo nga si Ethan may kalabotan gayod sa nahitabong krimen. Mao nga dihang nalutsan na siya’g warrant of arrest, nakahukom kaming dakpon siya.

Igo lang miyangoyango si Sonia sa giasoy ni Roy. -- Sumpayan pa