Ug karon pa gyud maatol nga gusto niyang magminyo na sila si Bradley ug makasal sa labing daling panahon! Dili siya makatugot nga mailog si Bradley ni Sandra gikan kaniya. Iya lang si Bradley!
Samtang naghunahuna niini, ingon sa kombinsido na gayod siya nga may relasyon sila si Bradley ug Sandra. Ug misamot paggantuong ang iyang pangabubho.
Subli niyang gibasa ang anunsiyo. Naghunahuna siya kun unsay angay niyang buhaton.
Natugaw ang pagpahuway ni Morris Sta. Ana sulod sa iyang lawak sa ilang resthouse nga nahimutang sa Sirao, usa ka bukirang barangay nga nahisakop sa dakbayan sa Sugbu, sa dihang mitingog ang message alert tone sa iyang cellphone nga gipatong sa ibabaw sa lamesita.
Iyang gikawhat ang iyang cellphone ug gisusi kun kinsay nag-text. Iyang nasuta nga wala marehistro sa phonebook sa iyang cellphone ang numero nga nagpadala og text. Iyang gibasa ang text bisan wala siya makaila sa nagpadala niini kaniya.
“Gud pm. Nakaila ko sa n ung gipangita nga babaye. I know kun hain si Sandra Diolan,” nagkanayon ang text.
Mitingkag ang mga dalunggan ni Morris sa iyang nabasa. Dihadiha gitawagan niya ang numero nga nagpadala sa text. Gusto niyang ikasulti’g maayo ang tag-iya sa maong cellphone number. -- Sumpayan pa