Gikasilagan ko ang kalibotan

Gula 43

Gihinuktokan ni Sonia ang gisulti ni Roy.

“Dako ang akong pagtuo nga ang nagpatay kang Helen Ogmoc ug Ninez usa ka serial killer,” padayag ni Roy.

“U-unsa?” Nakugang si Sonia.

“Mao kana, Sonia. Ang ako lang gikalibgan kay sa higayon nga makapatay ang maong mamumuno, aduna man dayo’y manawag ug mopahibalo kanimo sa nahitabo. Dili kaha nga ang serial killer mao ra usab mismo ang misteryoso nimong caller?”

Wala motubag si Sonia. Mipitokpitok lang ang iyang mga mata. Gihinuktokan niya ang gipadayag nga hunahuna ni Roy.

“Dako gyud ang posibilidad, Sonia, nga ang serial killer mao ra usab ang misteryoso nimong caller. Human niya ilabay ang patay’ng lawas sa iyang mga biktima, manawag dayon siya aron pagpahibalo kanimo. Posible nga nakaila gayod kanimo ang killer ug nakaila ka usab kaniya apan wala ka lang masayod nga siya mao ang mamumuno.”

“U-unsay buot mong ipasabot?”

“Sa akong pagsabot, Sonia, dako ang pagpakabana sa misteryoso mong caller bahin sa imong career. Kun siya ang serial killer mismo, mao kini ang hinungdan nga ikaw gayod ang iyang unang pahibaw-on kun makapatay na siya.”

“Pero sa unsa mang hinungdan? Nganong magpakabana man siya sa akong career nga wala man siya’y labot sa akong kinabuhi?” -- Sumpayan pa