Misyon sa kasingkasing

Gula 19

“Mas maayo sab hinuon aron malingaw ka,” ni Bradley pa.

Daghang kustomer sa restaurant ni Nang Diday sa Manalili. Miabag si Sandra sa mga bulohaton sa sulod sa kan-anan. Mitabang siya pag-atiman sa mga kustomer.

“Nia man diay kay bag-o ug imported nga helper, Nang Diday,” matud ni Sancho, usa ka suki ni Nang Diday sa restaurant.

“Ayaw’g tinontohi kanang akong pag-umangkon, Sancho,” badlong ni Nang Diday sa nangomedya. “Wala baya kana maanad og tistis.”

“Aw, imo diay ning pag-umangkon?”

“Oo, uy. Anak kini sa akong igsuon nga naminyo didto sa Cagayan de Oro.”

Si Sandra nga nagpamati sa panagsulti sa duha nahimuot sa hilom. Nalipay siya nga wala siya isipa nga laing tawo ni Nang Diday. Mituman gayod kini sa gikasabotan nila ni Bradley nga patuohon nila ang katawhan nga pag-umangkon siya niini.

Labaw sa tanan, nalipay ug nagpasalamat siya nga gikahimamat ang usa ka tawo nga sama kang Bradley. Dako ang iyang pagsalig kang Bradley. Nakaseguro siya nga makatabang si Bradley kaniya sa umaabot nga mga adlaw.

Lapoy ang lawas ni Sandra sa tibuok adlaw niyang pag-abag kang Nang Diday sa mga buluhaton sa restaurant. Nabag-ohan siya sa maong bulohaton nga karon pa niya masulayi ilabi na nga wala siya maanad sa ingong matang sa mga bulohaton. Wala siya makasinati og ingon niini didto sa Davao. -- Sumpayan pa