Gikasilagan ko ang kalibotan
Gula 7
Igo lang mipahiyom si Sonia sa komento sa editor.
Gipunit sa editor ang iyang manuskrito ug gipakahitan kini pagbasa. Unya maoy sunod nga gitan-aw niini ang mga hulagway nga iyang gi-submit. Gitagsatagsa pagtan-aw sa editor ang mga hulagway.
Unya nakita ni Sonia nga mikulismaot ang nawong sa editor. Unya gibutang niini’g balik sa ibabaw sa lamesa ang iyang manuskrito ug ingon man ang mga hulagway. Nagpanglingo kini nga mitan-aw kaniya.
“Nga-ngano man, Sir?” Mahibudngon nga nangutana si Sonia.
“Ingon lang ba niana ang matang sa estorya nga imong idalit sa atong mga magbabasa?” Gisumbalik siya pagpangutana sa editor.
Wala motingog si Sonia.
“C’mon, Miss Atienza,” ni Mr. Orioque pa. “Ayaw ko’g ingna nga gitay-an na ang imong abilidad sa journalism? Karaan na kining imong estorya. Tinuod nga mao kini ang matuod nga nahitabo sa katilingban. Pero ang imong sinuwat dili makapausab sa sistema.”
Nahisagmuyo pag-ayo si Sonia. Unang higayon kini nga gibalibaran ni Mr. Orioque ang iyang sinulat.
Misugmat ang kalagot ni Sonia. Dihadiha iyang gipunit ang iyang manuskrito gikan sa desk ni Mr. Johnny Orioque ingon man ang mga hulagway. Nagkusmod siya nga migawas sa buhatan sa editor. -- Sumpayan pa
- Latest
- Trending
