Nagtakoban nga pagbati

Wala motingog si Denia. Gihinuktokan niya ang gisulti ni Nang Luding.

“Buotan baya kana si Allan, Day,” gikan ni Nang Luding. “Dili mapahimuslanon sa higayon ug dako’g respeto sa mga babaye.”

“Nganong nakasulti ka man niana, Nang?” Usisa ni Denia.

“Nasuheto na ko sa kinabuhi ni Allan, Day, tungod kay dugaydugay na kaming nag-alagad sa pamilyang Ricarte. Nauna lang ko niya’g pipila ka tuig niining baya.”

“M-mao ba, Nang?”

Mao gyud. Kaniadto may misulod dinhi pagka-katabang nga taga Negros. Flirt kaayo kadtong maong babaye. Walay kober-kober nga mipadayag nga dako kini’g gusto kang Allan. Apan si Allan wala gayod magtagad sa maong babaye bisan kuwang na lang og diyotay kun dili ipanghagad ang kaugalingon niini kaniya.”

Sa hilom, nakadayeg si Denia sa kabuotan ni Allan gumikan sa iyang nasayran gikan kang Nang Luding. Kasaligan diay nga pagka-lalaki si Allan. Ligdong ug matinud-anon.

Pagkasunod semana, nakahigayon na usab si Allan sa pagsukna kang Denia mahitungod sa gugma nga gihalad niini kaniya.

Gusto na kong masayod sa imong tubag, Den,” nagkanayon si Allan samtang nagtupad sila sa pagpanglingkod sa lingkoranan sa gawas sa servant’s quarter.

Mingaw na ang kagabhion. Nangatulog na ang ilang mga agalon. Sila na lamang duha ang nagtikawtikaw diha sa gawas. -- Sumpayan pa