Kilometro 35

Gula 86

Tsug! Tsug! Tsug! Tsug! Tsug! Tsug!

Naigo si Sheldon sa lainlaing parte sa iyang lawas sa akong pagpusil. Daw sa misayaw siya sa kasakit. Unya nahagba siya sa yuta nga nagkulob. Wala na siya maglihok. Nabuhian niya ang iyang armas.

Mihinay ko’g paduol sa iyang nahimutangan. Gusto kong seguroon nga patay na siya. Mitikubo ko dihang nahiabot na ko sa iyang tungod. Gigunitan nako ang tuo niyang abaga aron pahayangon siya.

Apan nakalitan ko dihang iya kong gigunitan. Kusgan pa diay kaayo si Sheldon. Milugnotlugnot ko. Unya iya kong gilambuyog dungan sa iyang pagbangon. Nahasalibay ko ug nahapangka sa usa ka panteyon.

Gidali pagpunit ni Sheldon ang iyang armas. Nahibulong ko sa nahitabo. Ingon sa wala siya maunsa sa akong pagpusil kaniya. Mora gani’g walay mga samad ang iyang lawas kay wala may dugo nga nanggawas. Ingon sa ang jacket lang nga iyang gisul-ob maoy nabuslot sa akong pagpusil.

Mibati ko’g kalisang dihang gipunting ko ni Sheldon sa armas nga iyang gigunitan. Hain na man ang mga vigilante? Nganong wala pa man sila molihok aron pagluwas nako gikan sa tino nga kamatayon?

“Danghag ka, Sandra,” nagkanayon si Sheldon. “Nagtuo ka tingali nga bugo ko sama sa akong mga barkada nga imong napatay sa dakong kasayon!”

Gihukas ni Sheldon ang jacket nga iyang gisul-ob. Ug akong nasuta kun nganong wala siya madutli sa akong pagpusil.

“Segurista ko, Sandra,” ni Sheldon pa nga mipikpik sa bullet proof vest nga iyang gisul-ob. Gipangandaman nako’g maayo kining atong panagkita karon kay nasayod kong nagtinguha ka’g daotan sa akong kinabuhi.”

Nahasagmuyo ko sa akong nadiskobrehan kang Sheldon.

“Ug karon,” ni Sheldon pa nga mihugot nag gunit sa pul-an sa iyang armas. “Ikaw ang mamatay, Sandra!” -- Sumpayan pa