Mibawos ang iro nga ungo

Tiguwang na si Nang Basyang ug wala na gani magpalabada kaniya kay maluoy tungod sa pangidaron niini. Tingali mokapin na sa sitinta anyos kini si Nang Basyang.

Kaniadto, matud pa sa taga dinhi sa ilang balangay sa Bulak-Tangad, si Nang Basyang mao ang labing matahom sa mga dalaga dinhi.

Daghan kaayong naibog sa hilom ni Basyang ug usa niini mao si Felipe, ang anak ni Attorney Sumolong nga dunay bupiti sa lungsod. Buotan usab kini si Felipe kay dili man parehas sa mga anak sa mga dato sa lungsod nga sudlan ang tanang matang sa mga bisyo sama sa paggamit sa ginadiling drogas ug uban pang matang sa mga bulohaton nga supak sa balaod.

Ug maong wala dayon dugaydugaya ni Basyang ang pagpaninguha ni Felipe kaniya. Iya dayon kining gisugot. Ug nadungog gani nga gitakda na ang kasal nila ni Basyang ug ni Felipe.

Unya usa ka gabii may nahitabo kang Felipe kay gidunggab siya sa usa ka wala mailhing mamumuno. Nayabyab ang tinai ni Felipe tungod tingali sa kahait sa punyal nga gigamit sa kriminal.

Adlaw ug gabii ang pagpunay’g hilak ni Basyang apan ang tanan kawang lamang kay dili na man gyud mahitabo nga mabuhi pa si Felipe. Hinuon, may handomanan nga gibilin si Felipe kaniya ug kini mao ang usa ka itoy nga ginganlag Buldog.

Nindot nga pagka-itoy kini si Buldog ug malipay na lang si Basyang nga magtan-aw sa itoy sa higayon nga mingawon siya ni Felipe.

“Yati, misamot ron kanindot ang lawas ni Basyang da, bay Akoy, ug paminaw nako gihidlaw na kana siya karon og usa ka gakos, he, he he,” mikagigi si Binong nga mipahayag ngadto sa iyang amigo nga bugoy usab sama kaniya. Kini si Binong anak og tubigtubigan dinhi sa ilang balangay ug nadungog na siya nga usa ka drug addict ug usa usab ka tigpayuhot sa maong ginadiling drogas.

“Unya, unsa may imong plano ron, Bay, nga wala na man si Felipe, di nimo diskartehan si Basyang. Kada Sabado manglaba ra ba na siya sa tubod ug lugar kaayo ka. Lamia ra ba’g lawas ni Basyang, uy, bay Binong,” ni Akoy pa usab nga mipahiyom.

Tuod, may laraw nga dili maayo nga namugna sa hunahuna ni Binong. Iyang angkonon ang pagka babaye ni Basyang apan maglikay-likay ang dalaga kaniya. Unya milabay ang daghang mga adlaw ug midako na pag-ayo ang iro ni Basyang nga si Buldog.

Ug matag gabii, may mabati silang tingog sa wakwak nga didto ra magwakwak duol sa balay ni Basyang. Si Basyang na man lang gud ang nagpuyo sa ilang balay kay ang iyang inahan nga si Iya Tinang, namatay man niadtong miaging bulan. Gidungog-dungog ra ba kuno kadto si Iya Tinang nga kaliwat og ungo ug may nakakita nga nagtuwad ilawom sa punoan sa kamansilis usa ka udtong tutok.

Unya didto sa tindahan ni Sibya-Toryo diha sila si Binong ug ang iyang mga barkada. Nag-inom sila. Unya kalit lang nga may nasiklapan si Binong ug kini mao ang iro ni Basyang. “Yamat, nindota nga pagka-iro niana, bay Akoy. Atong kusahoson, kay wala na man tay ikasum-som. Si Medyong, ay, maayo kaayong moluto og iro...” ug gibunalan ni Akoy ang iro ug wala kini maintamano ug nakadagan nga nagtakiang.

Usa ka gabii mihingkod na gyud ang daotang laraw ni Binong ngadtong Basyang ug sabot nila nga ilang tabangan og lugos si Basyang. Tuod, natuman ang ilang laraw ug diriyot mamatay si Basyang. Pagka-sunod adlaw hipalgan ang mga patay’ng lawas sa mga barkada ni Binong nga nakuniskunis ug wala nay mga tinai ug atay.

Si Binong nakasibat ug wala na mopuyo sa balangay sa Bulak-Tangad. Dugay na kadto ug si Binong tiguwang na usab dihang mibalik siya sa ilang balangay. Apan usa ka gabii dihang nanaog siya sa silong aron mangihi, may babaye nga nagbarog atbang kaniya. Hayag ang buwan ug nakaila si Binong, si Basyang. Ug giduol ni Basyang si Binong.

“Maayong pagbalik dinhi sa ato, Binong, basin og nalimot ka sa imong gibuhat nako, nga inyo kong gitabangan og lugos...” Unya mikalit pagdasmag ang iro ni Basyang ug gikuniskunis si Binong. Pagkabuntag naukay ang tibuok balangay sa nahitabo ni Binong nga nawataswatas ang lawas. (Kataposan)