Nakakaon og tagam si Leo

Holy Family Road

Nivel Hills, Lahug, Cebu City

Niadtong 1979 miadto ako sa Manila aron pagkuha og pasulit sa pagka Customs Broker. Usa ka hapon sa adlaw'ng Domingo miadto ko sa Luneta Park. Wala ko damha nga magkakita kami ni Leo. Dugay na nga wala kami magkakita. Nagkauban kami sa Fourth Year High School sa pagtungha namo sa University of the Visayas.

"Komusta, Leo" timbaya ko.

"Maayo man. Komusta sab?" matud niya.

"Diin ka man nga wala man kita igkita sa atong istambayanan nga Chess Club."

"Nanakay ako sa barko nga nagbiyahe sa gawas isip oiler," matud niya.

Usa ra ka tuig ang among kontrata. Nahuman na ang akong kontrata ug ania nangaplay na usab og lain. Gihulat ko na lamang ang line-up sa among ahensya."

Ang tinuod nga ngalan niya, Leonardo. Gianggaan siya og Leo sa iyang mga kaila. Usa siya ka Fourth Marine Engineer. Apan kung motrabaho siya sa gawas, oiler ra ang iyang posisyon. Misulay siya pagkuha og Marine Engineer Board Examination para pagka Third Engineer apan nahagbong siya. Usa siya ka ulitawo. Nag-edad na lang siya og kuwarenta apan wala pa siya magminyo. Nasayod ko sa hinungdan nga wala siya magminyo. Kini tungod kang Edith nga iyang hinigugma kanhi. Iyang gipatungha sa kolehiyo apan sa dihang nahuman na sa pagkuha og kurso, nagminyo sa lain samtang siya didto sa gawas sa nasud.

"Mangita na lang og laing babaye nga imong kasaligan," tambag ko kaniya. Hikalimti si Edith. Aduna pay daghang babaye nga imong makaila."

Apan wala siya motoo sa akong gisulti. Gipalabi niya nga dili na lang magminyo.

"Natagam na ako sa mga babaye. Basin maparehas kang Edith. Tapos mo gastohi sa pag-eskuyla, mangita og lain," matud niya. "Labi na kung ako pang naasawa, magmata lang ako og buntag." (Kataposan)