Kagahapon ang gugma ug karon

Parehas sila nga mga balikbayan sa ilang baryo. Si Riel usa ka lisensiyadong civil engineer nga atua na manarbaho sa Kuwait. Si Rosemarie, usa usab ka lisensiyadong nars nga atua na manarbaho sa Canada.

Tayming nga nagkadungan sila og bakasyon sa ilang baryo. Parehas sila nga nagpabiling ulitawo ug dalaga sa edad nga trayente. Nagkasabot sila si Riel ug Rosemarie nga mag-abot sila sa busay, ang dapit nga kanhi ilang kaligoan sa mga bata pa sila.

Nagtupad sila paglingkod sa nagaigdal nga gamot sa dakong punoan sa bangkal nga nag-ambo ngadto sa busay. Sa makausa pa, gisud-ong na usab nila ang matin-aw’ng tubig sa busay. Si Riel ang unang mibuak sa kahilom.

"Abi nako'g naminyo ka na's Amerika, Rose...!"

"Wa nako mapalgi didto ang ideal man ko! Nagdahom ko nga naminyo ka na sab sa Kuwait, Riel...!"

"Way babaye nga nakapapitik sa himilian kong kasingkasing didto's Kuwait, Rose...!"

Diyutay'ng kahilom. Mikalit og ka pormal ang nawong ni Riel nga milingi ug mitutok kang Rosemarie. Nagkasugat ang ilang tinan-awan.

"Rose, nindotang handumon sa atong kagahapon no...? Sa atong kabatan-on kanhi nga malipayon kaayong magduladula ug maglangoylangoy sa busay...?"

"Bitaw, Riel! Sadya kaayo ta kanhi, no....?"

"Karon, may kausaban na, Rose...!"

"Syempre, hingkod naman god ta, Riel...!"

Karon, namalik sa ilang kaisipan ang masadya nilang kagahapon, diha sa matam-is nga paghandom.

Managsilingan sila si Riel ug Rosemarie. Suod. Managkadula sila, gikan pa sa gagmay'ng bata pa sila. Wa sila’y malisya sa usag-usa nga maghubo sa ilang panagdula ug paglangoylangoy sa busay. Way purol. Way panti.

Apan dihang natuli na si Riel ug nagregla na si Rosemarie, may kausaban na ang tanan. Magpurol na's Riel ug magpanti na's Rosemarie. May kataha na silang duha. Mag-ulaw-ulaw ug magkipikipi na silang duha.

Maila nga may gitagoan silang mga pagbati sa usag-usa. Pagkilab sa daghang katuigan, gibuligan sila sa kapalaran nga nahimong lisensiyadong enhenyero ug nars. Mga propesyonal na sila nga nagbalik-gawas sa nasud ug pag-abroad, diha sa way hunong nilang pagpanarbaho.

Karon, daw gitakdo pag-usab ang duha nila ka pagbati, sa usa ka dalan sa gugma. Parehas sila nga ulitawo ug dalaga. May gihunghong si Riel kang Rosemarie.

"Sa atong kagahapon, nakita ko ang imoha! Rose, unsa na kahay porma sa imoha...?"

Hinay nga gikusnit ni Rosemarie ang kilid ni Riel.

"Buing ini, ay! Ang imoha sab ...! Karon, di na ba pinutyong nga sako ang porma...?"

Nagkatinutokay sila. Hugot. Dugay. Sila lamang si Riel ug Rosemarie ang nakatugkad karon, sa matuod nilang pagbati sa usag-usa. (Kataposan)