Sukli Sa Utang

Akong first love si Rolando. Anak siya sa akong maestro sa mathematics sa fourth year. Bisan managlahi mi'g section apan may mga higayon nga magkasultihanay kami. Dihang nanguyab siya nako, gisugot ko dayon siya. Crush ko na siya sukad sa first year high school palang kami.

Dili ko mauwaw moangkon nga bugo kaayo ko sa mathematics. Sa tanang academic subjects sa high school, ang mathematics maoy kinalisoran para nako. Labina gyod ang trigonometry. Nabalaka ko nga mahagbong sa maong subject kay ubos kaayo ang akong grado niini. Ininat, matud pa.

Maayo gani kay mipasalig si Rolando nga iya kong tabangan. Iyang hangyoon ang iyang amahan nga si Sir Samson Cordales nga papasaron ko sa subject nga trigonometry bisan og hinay kaayo ko sa maong subject. Nalipay ko sa gipasalig ni Rolando nako.

Apan may tugbang diay ang mao niyang pasalig. Gusto niyang angkonon ang akong pagka babaye bugti sa iyang paghangyo sa iyang amahan nga maestro nga papasaron ko sa labing lisod nga subject alang nako.

"Di ko, uy," mibalibad ko. "Mga batan-on pa gani ta kaayo."

"Ngano man god diay?" Miinsister si Rolando. "Nahigugma man kaha ka nako?"

"Nahigugma ko nimo. Pero..."

"Kun tinuod nga gihigugma ko nimo, ihatag mo kanako ang akong gusto."

"Ang ako ra ba diay'ng pagka babaye ang imong giapas?"

"Dili, Editha. Gihigugma ko ikaw. Mao nga gusto kong maneguro nga kita na gyod. Ug ang pag-angkon sa imong pagka babaye maoy nahunahunaan kong paagi aron dili ka na mailog sa laing lalaki gikan kanako kay dili pa man ta makasal kay pulos pa man ta menor de edad."

"Pananglit dili gyod ta magkadayon, alkanse ko kay naangkon na man nimo ang akong pagka babaye?"

"Ipaneguro ko nga kita gyod ang magkadayon, Editha. Dili ko makatugot nga laing lalaki ang makatag-iya kanimo."

Wala ko motingog. Naghinuktok ko sa gisulti ni Rolando.

"Dili ka magbasol kun itahan mo ang imong kaugalingon kanako, Edita," nagkanayon si Rolando. "Gawas nga tabangan ko ikaw og hangyo kang Papa aron makapasar ka sa subject nga trigonometry, malipay ka usab sa atong pagabuhaton. Ug ayaw kabalaka. Ikaw ra ang babaye nga akong dad-on sa atubangan sa altar sa kaminyoon inig-abot sa tukmang panahon."

Inanay kong nakombinser sa gisulti ni Rolando. (Sumpayan pa)