Ang ihalas nga sunoy

Nakapahiyom si Binog nga nagsud-ong sa bag-o lang nahuman niya paghimo nga lit-ag. Sa iyang tupad, diha usab si Jimmy, ang bugtong niyang anak nga nagkupot sa dalang gomang tirador. Site anyos pa si Jimmy, apan nahilig na sa pagpanirador og kalanggaman sa banika. Sayo ni nga nailo sa inahan kay namatay sa pagpanganak niini. Panguma ang panginabuhian nila ni Binog ug Jimmy sa banika.

"Pa, tiradoron na lang nato ang ihalas nga sunoy. Ayaw na lang lit-agi...!"

Gipikpik ni Binog ang abaga ni Jimmy.

"Dong Jim, gusto nako nga madakpang buhi ang ihalas nga sunoy sa atong banika. Mao nga lit-agon lang ni nako..."

Tangkod na nga semana nga namatikdan ni Binog ang kanunay'ng pagpatim-aw sa ihalas nga sunoy sa gitikad niyang luna sa banika. Tagming ug kurog kaayo ang tuktugaok sa ihalas nga sunoy.

Pula ang balhibo niini ug hilabihang taasa sa bawog nga lawi niini nga misangyad sa yuta. Hilabihang taasa usab sa tahod niini. Sanglit hilig og hiniktan ug panari sa bulangan, gustong malit-ag ni Binog ang ihalas nga sunoy aron idugang sa gigalam niyang mga hiniktan.

Naghimo dayon og lit-ag si Binog, daplin sa banika nga maoy sagad suroyan sa ihalas nga sunoy. Nagbawog siya og gamay nga punoan sa tuhogtuhog. Gitaoran sa pising lambo nga gihimo niyang laang. Nag-ugsok siya og duha ka gagmay'ng haligi sa yuta. Gipahaoman niya sa duha ka babag sa gamay'ng kahoy nga gisangga sa pitiw sa pising lambo. Gihimoan niyag salog-salog ang lit-ag nga maoy gihaklapan niya sa laang. Gialihan niyag mga bato ang matag atbang sa lit-ag. Gibutangan og paon nga lugas mais. Iniglabang sa ihalas nga sunoy sa pikas atbang, unya, matumba ang salog sa lit-ag nga anaa ang laang, molibkas ug mopitik dayon ang bawog sa lit-ag ug seguradong mabitik dayon ang tiil sa ihalas nga sunoy.

Naghupo nga naniid si Binog sa pagpatim-aw sa ihalas nga sunoy diha sa iyang lit-ag. Nagpasalipod siya sa dakong guk-ong nga bato. Milingay na ang Adlaw sa kahaponon. Nasigpatan usab niya si Jimmy sa unahan nga naghupohupo ubos sa punoan sa dakong tugas nga nagkupot sa iyang tirador. Kalit nahasiga ang mga mata ni Binog. Sa ulohan sa iyang anak, maoy nasugat sa iyang panan-aw ang usa ka halas nga lawaan nga andam nang motundok kang Jimmy. Apan wa pa gani siya makasinggit sa iyang anak, kalit lang nga nabati niya ang kusog nga kapakapa sa mga pako sa ihalas nga sunoy nga kalit lang mipatim-aw. Gisakdapan ug gilabokan ang nagyunyon nga ulo sa halas nga lawaan!

Napahangad si Jimmy ug daling midagan paingon sa nahimutangan ni Binog nga hilabihang hadloka.

"Pa, b-bitin! B-bitin, Pa...!"

Gigakos ni Binog ang nalisang nga anak. Ang halas nga lawaan nga nakalitan sa pagsakdap ug paglabok kaniya sa ihalas nga sunoy nga ginuntan pa sa pagsyapol sa lawas sa halas, abtik nga midailos sa sanga sa tugas ug paspas nga mikamang paingon sa unahan nga daw gibati og kahadlok. Mapagarbohon kaayong mituktugaok ang ihalas nga sunoy sa iyang tagming ug pinakurog nga tingog.

Nakapanglingo si Binog sa iyang nasaksihan. Giluwas si Jimmy sa ihalas nga sunoy gikan sa pagtundok unta sa halas nga lawaan.

Nakahukom si Binog. Milakang siya paingon sa iyang lit-ag. Gub-on niya ang iyang lit-ag nga alang unta sa ihalas nga sunoy. (Kataposan)