Sex Worker

Bisan mas dakog lawas nako si Elvira apan wala siyay dag-anan sa among grupo. Gawas nga tubigon siyag lawas, tambok sab siya kaayo busa hinay og lihok. Maong gidula-dulaan ko lang siyag minaru nga taktika sa among bugno. Ang resulta, siyay nahiagom sa mas grabeng bun-og. Mipauli siya nga nanglagom ug nanghubag ang nawong sa daghang mga bun-og ug mga kinawrasan.

"Ikiha ta gyod ka!" Mibahad pa siya dayong biya sa akong gipuy-an. "Kiha lang!" Gitubag ko siya.  Pero sa hilom nabalaka ko nga tingalig tinud-on ni Elvira ang iyang bahad nga iya kong ikiha. Dili ko gustong mag-atubang og kaso sa korte kay hasol na kaayo. Makasagabal kini sa akong panginabuhi. Dili ko gusto nga malambigit sa ingon niining matang sa problema kay wala ra ba koy kuwarta nga ikagasto og buroka.

Milabay ang duha ka semana. Nagpaabot ko nga padad-an og subpoena o kaha bisan unsang notisya nga may kalabotan sa pagpasaka og kaso ni Elvira nako pero walay nahiabot. Nasayran ko na lang gikan kang Gabor nga may nakatambag diay kuno kang Elvira nga dili na lang mohinayon pagkiha  kay  siya ra ba ang nanulong didto sa akong gipuy-an. Dili kuno dako ang tsansa nga makadaog siya sa kaso. Maong wala na lang mohinayon pagkiha si Elvira. Nalipay sab ko sa hilom kay nagpasabot man kini nga wala na koy angay kabalak-an. Wala nay makahasol sa akong hunahuna.Maka-concentrate na ko sa akong trabaho matag gabii.

Milabay ang usa ka bulan. Nabalitaan ko na lang nga nadugangan pa gyod ang problema ni Leandro. Gipaserad-an ang iyang security agency gumikan kay nadiskobrehan man kini nga kolorum. Dili kini kompleto sa mga dokumento nga gikinahanglan pag-operate. Nabuking kining maong iregularidad dihang misang-at og reklamo ang iyang mga security guard gumikan kay wala na siya makasuweldo ngadto kanila ug wala pa gyod silay SSS ug ubang mga benepisyo.

Nabuking hinuon nga kolorum ang security agency ni Leandro ug napugos siya sa pagpasera niini. (Sumpayan pa)