Dugos Ni Eva

Gula 262

Matagbawon ang among pagpinarayganay. Managsama kami si Rodney nga mibatig kalipay sa among gibuhat. Tungod sa kalalim sa among panaghilawas nahikalimtan ko sa makadiyot nga bisan unsang orasa mahimong hasolon na usab kami sa mga tawo nga nangita nako. Migahom sa akong kinatibuk-an ang tumang kahinam.

Human sa tulo ka lovemaking session, nangatulog na kami si Rodney. Pagkabuntag, dugay ming nakamata. Gipukaw na mi ni Iyo Andoy aron makapamahaw. Bisan alas siyete na hapit apan namilitpilit pa gihapon ang lasangnong katugnaw.

Human makapamahaw, nananghid na mi ni Iyo Andoy nga mopadayon na mi sa among panaw. Gipasalamatan namo ang maayong pag-abiabi sa tigulang namo. Dayon mibiya na mi sa tugkaran sa iyang balay. Misunod ko ni Rodney nga misugod nag yuhot sa bagang kakahoyan. Walay tumong ang among paglakaw.

Paglabay sa usa ka oras, layo na mig naabtan sa among paglakaw. Awaaw na kaayo ang dapit nga among nasum-okan. Mao ray among madungog ang awit sa mga langgam ug tingog sa ubang mga mananap sa lasang. Tungod sa kalabong ug kabaga sa dahon sa mga kahoy, ang silaw sa adlaw lugos makalapos sa yuta.

Namahulay una mig kadiyot. Pagkataodtaod mipadayon na sab mi sa paglakaw nga walay tumong ilawom sa bagang kakahoyan.

“Asa pa man diay ta?” Nangutana ko ni Rodney dihang sa akong paniid nahiabot na mi sa kinataliwad-an sa dakong lasang.

“Sunod lang nako,” maoy iyang tubag.

“Morag layo na man kaayo ning lugara?”

“Mopalayo pa gyud ta aron pagseguro nga dili ta sayon tultolon sa mga tawo nga nangita nimo.”

Mipadayon pa gyud mi paglakaw. Gikapoy na ko. Hinay na ang akong mga lakang. Hangtod nga sa kadugayan namong pagbinaktas, natukmaan namo ang usa ka payag. Nagpaduol dayon mi sa payag nga among nakaplagan. -- Sumpayan pa