Sex slave

Gula 24

Wala ko makatulog. Nagpaniid lang ko sa mga lihok ni Tiyo Camilo bisan tuod nagtalikod ko niya. Paglabay sa pipila ka gutlo, nahuman na tingali siya’g panigarilyo kay namatikdan ko man nga mihigda na siya ug mibukot sa habol.

Taudtaod, nabati ko nga mihagok na si Tiyo Camilo. Mihinay kog liso paatubang kaniya. Gitutokan kog maayo ang iyang panagway. Malinawon siyang natulog. Nahinanok siya’g maayo. Natagbaw gyud tingali siya pag-ayo pagpahimulos sa akong pagka babaye. Wala lang tuyoa, misurok ang akong dugo nga nagtan-aw niya.

Mibalik kog takilid patalikod niya. Naibog kong nagpaminaw niya nga naghagok. Gusto na unta kong matulog apan ingon sa nawala na man hinuon ang akong duka. Kaadlawon na sa dihang nakatagpilaw ko. Minanok ang akong kinatulgan.

Hapit na ang kabuntagon sa dihang akong namatngonan nga mitapuko si Tiyo Camilo nako. Milimbag ug mikisi-kisi ko apan iya kong napugngan. Giukoban niya ang akong ngabil. Unya mikiat ang iyang  mga kamot sa pagpanghinol sa sensitibong mga parte sa akong lawas. Mipatong siya nako.

Wala maglangan si Tiyo Camilo. Giangkon dayon niya ang akong pagka babaye. Gipiyong ko ang akong mga mata samtang iya kong gikabhan, dili tungod kay gusto kong makabatyag sa kalalim sa iyang gibuhat, kundili tungod kay gingil-aran kong nagtan-aw sa iyang panagway nga ingon sa nagdungaw nako.

Human ikapahungaw ni Tiyo Camilo ang iyang biga, naghangos siyang mikawas gikan sa ibabaw sa akong lawas ug mihigda sa akong tupad. Wala lang ko maglihok nga nagpabiling naghayang. May mga luha nga midagayday sa akong mga aping.

“Pag-ilis na,” giingnan ko ni Tiyo Camilo. “Puyde ka nang mopauli.”

Wala ko motingog. Mihinay kog bangon ug nag-ilis. Pagkahuman, migawas ko sa lawak aron mopauli na sa akong boarding house.

Nagpadayon ang kalbaryo sa akong kinabuhi. Wala gayuy usang nasayod nga gihimo kong sex slave ni Tiyo Camilo. Nagpabilin ang akong kahadlok nga tingalig tinud-on sa akong uyoan ang iyang gibahad kun mabutyag ngadto sa lain ang iyang paglugos nako. Hangtod nga miabot ang higayon nga wala na ko makaantos. -- Sumpayan pa