Nagpalihi sa bag-ong tuig

Nag-ispoting si Gundo ning masilakong buntag sa bag-ong tuig. Gitina na niya og itom ang ubanon niyang buhok. Gihisoan niya kini sa paborito niyang pomada – ang Le Conte.

Gisul-ob na niya ang bag-o niyang pinalit nga long-sleeve nga polo-shirt nga kolor green. Bag-o lang usab nga mitokar ang iyang gana nga tigsul-ob na gayud og long sleeve nga polo-shirt.

Giparesan kini niya sa iyang tuskig kaayog plits nga kabardin nga karsones. Ang brown usab niay nga panit sapatos, hilabihan na gayud nga sinawa-labaw pa's kasinaw sa bukobuko sa bakukang. Bag-o usab nga kapeng medyas ang gituyo niya sa pagsul-ob karon, panagana nga di manimahong baklag kun singuton, kay baho ang iyang tiil kun singoton nga magsul-ob og sapatos.

Nanamin si Gundo, dayong sul-ob sa iyang giandam nga eyeglasses. Milutaw gyud ang unggoyon niyang kaguwapo nga bisan 70 anyos na, apan abtik ug lagsik pa kaayo ang pamatyag ug panglihoklihok sa lawas. Usa siya ka real-estate broker ug magtatampong magsusulat usab sa Banat News.

Bitbit ang puti niyang plastic envelope nga gisudlan sa mga papeles sa yuta ug mga sinulat, abtik nga misakay og taksi si Gundo. Nakahukom siya nga magpalihi. Didto siya magpahatod sa Kamagayan. Tayming sab nga dako-dako ang nakobra niya sa Banat News ug naka-deal usab og yuta sa nagsingabot ang Pasko ug bag-ong tuig. Mao nga full-packed ang pitaka ni Gundo karon, bisan nakagasto siya sa Pasko. Hayahay gayud ang kahimtang ni Gundo, ilabi na kay nagpabilin siya nga gulang ulitawo, hangtod ning panahona.

"Yatis, magpalihi ka, Gundo?" nagtingsi ang edarang bugaw nga upaw. "Tayming kay anaa ang batan-on mong suki, bag-o lang nakatugpa!"

"Si Bebie gyud ang tuyo ko! Nagsabot man mi sa nakalabay'ng Pasko nga magpalihi mi karon...!" nagyangoyango si Gundo nga nagpahiyom sa edarang bugaw.

Human magkasinabot sa presyo nga di ikatala sa resibo, gitihoyan dayon sa edaran ug upaw nga bugaw ang suki ni Gundo.

Nagpanilap si Gundo nga nagtan-aw kang Bebie nga migawsa. Nagsul-ob kini sa pakigol nga puting short pants, nga giparesan sa bodyfit nga pulang t-shirt. Nag-amag sa kaputi ang batan-ong inday-inday nga nagpahiyom kang Gundo.

"Hi, happy new year, Lolo! Aw, este, Noy Gundo! Gilib gyud ko nimo....! Mokatkat gyud sa kapayas....!" nagkatawa si Bebie.

"Magpalihi ta, Bebs...!" ni Gundo nga nagkihatkihat ug ang iyang eyeglasses midailos na sa lisngag niyang ilong. Giagbayan dayon niya si Bebie ug nanulod sa giandam nga kuwarto. Nagpahiyom usab si Bebie nga paraygong milikos sa tuong kamot sa hawak ni Gundo. May pasidaan siya kang Gundo nunot sa paghunghong niini.

"Noy Gundo, palihi kun palihi man ta, apan paninguha baya nga di na ka makaigit karon...! (Kataposan)