^

Banat Kalingawan

Sa paglugwa sa 'SummerSunshine'

- Ryan Mark -
Singkwenta kapin ka eksena ang gigama sa Hongkong. Dili sayon ang maong bulohaton ug gani nakasinati pa sila og interogasyon gikan sa usa sa mga polis nga nagbantay sa park nga ilang gipahigayonan sa taping. Ug sila mirason, nga sila mga tinun-an nga naghimo sa ilang proyekto sa ingon dili na sila dad-on pa sa presinto ug didto sukit-sukiton ug malangay na hinoon sila og maayo.

Salamat kay mitoo ang maong polis, ug gawasnon sila nga nakapadayon sa taping bisan pa man tuod og kasagaran sa mga anggulo long shots na lang imbes gikinahanglan nga dunay close-up. Kining tanan gihimo nila, alang sa kalingawan sa mga Bisaya nga inanay na nga nakadayeg sa potensyal sa Cebuanovela nga mogitik sa ilang mga galamhan, matag karon ug unya. Mao kini ang kasaysayan sa labing bag-o nga dalit sa ABS-CBN Regional Network Group nga magsugod na ugma, alas nuwebe kinse sa buntag - ang "Summer Sunshine."

Human gipakatawa ang publiko pinaagi sa "Milyonaryong Mini," ug nakilig ang mga kabatan-onan sa "Amor Chicko," dinhi sa "Summer Sunshine" mahimong mokatawa, mahinuklog ug ma-in love ang tanan bata man o tigulang ilabi na ang mga romantiko. Nagsugod sa Sugbu ang istorya sa dihang mga bata pa sila si Andrew ug Andrea, diin nagtuo sila nga magsuon silang duruha, mibalhin og puyo ang pamilya ni Andrea (Sunshine Cunanan) sa Davao ug mibalik siya paglabay sa 10 ka tuig nga dalaga na ug usa ka college intern. Unsay mahitabo kun magkuros og balik ang ilang mga dalan ni Andrew (Blue Marc) sa Sugbu? Gawasnon ba ang ilang mga kasingkasing niining panahon nga nakasabot na silang duruha nga dili diay sila magsuon sama sa ilang pagtoo niadtong mga bata pa sila? Dinhi magsugod ang kasaysayan sa gugma, nga mahimugso sa puting baybayon sa Camotes Island ug milipang sa ilang paglupad paingon sa maanindot nga talan-awon sa Hongkong.

Mabulokon ug ambisyoso ang maong proyekto sanglit una kining higayon sa ABS-CBN Cebu nga migawas sa nasud aron paghimo og Cebuanovela. Una usab kining higayon ni Sunshine isip bida. Si Blue Marc kinsa lumad nga taga Bohol ug usa sa mga gikagubtan na karon sa tibuok nasud pinaagi sa youth oriented program "Let's Go," unang higayon usab niini nga malakip sa usa ka Cebuanovela, samtang ang duha pa ka main casts - si Cassidy Shun ug Charlene Go mga first timers usab. Si Shun usa sa mga pambato sa Models Association of Cebu, samtang si Charlene kanhi VJ sa Cebu Channel ug naila isip events host.

Ang batan-ong direktor ug scriptwriter nga si Jurey Mirafuentes, mibutyag atol sa presscon kagahapon sa hapon nga sa dihang gitagik pa lang niya ang "Summer Sunshine", si Blue Marc misantop na sa iyang huna-huna sanglit ilado na kini ug Bisaya. Gidugang niya nga panahon na usab nga mobidlisiw si Sunshine isip bida. Suma pa ni Jurey kinahanglan na lang nga lutuon og maayo ang loveteam ni Sunshine ug Blue Marc, ug base sa teaser nga gipakita ngadto sa Cebu press kagahapon, daw malampuson ang putahi nga gimugna ni Jurey. Busa kamoy hukom, sugod ugma puhon sa alas 9:15 sa buntag.

AMOR CHICKO

ANDREA

BISAYA

BLUE MARC

CEBUANOVELA

SILA

SUMMER SUNSHINE

  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with