Kwarta sa patay gi-withdraw sa mipatay - 1

Hunat pagdagan, tago kutob sa mahimo apan ayaw og lingi! Ngano man? Ang tubag masayran pinaagi sa co-production movie venture sa Viva Films ug Star Cinema, "Wag Kang Lilingon" nga isalida na sa mga sinehan lukop nasud karong Miyerkules, Nobiyembre 15. Kining maong pelikula sama sa gipatik na dinhi sa Banat Hugyaw sa milabay nga buwan, gibitoonan sa duha sa labing mga maanyag nga young actresses sa atong panahon-Anne Curtis ug Kristine Hermosa. Lig-on ang naglangkub sa cast nga giduyogan usab sa mga malambuon nga direktor- Jerry Seneneng ug Quark Henares. Apan dunay pangutana nga nagpahipi, matupngan ba kon dili man malabwan ang kalampusan sa "Sukob" nila ni Kris Aquino ug Claudine Barreto nga produkto usab sa Star Cinema?

Ang "Wag Kang Lilingon" gibuak ngadto sa duha ka istorya- "Uyayi" ni Anne ug "Salamin" ni Kristine. Sa maong pelikula naghatag og kinabuhi sa usa ka nurse nga dunay mahayag nga kaugmaon apan nagkatulibagbag human siya nakatrabaho sa usa ka ospital diin walay puas ang makapahibulong nga pagkamatay sa mga pasyente. Si Anne (Melissa) naghimog pakisusi kauban sa iyang hinigugma nga si James (Marvin Agustin). Apan sa iyang panganti nga ilhon ang responsabli sa nagpadayon nga krimen, lain ang iyang nakaplagan ug napalgan? Apil ba usab si Melissa sa mamatay?

Samtang sa "Salamin" si Kristine ug ang iyang pamilya gibiyaan sa iyang amahan gumikan sa kabit niini. Isip breadwinner, midesisyon siya nga mobalhin sila og lain nga pinuy-anan. Dinhi magsugod ang kasamok sa iyang huna-huna ug pagbati gumikan sa karaan nga samin nga nahimutang didto sa maong balay. Pagtakdo sa orasan sa alas dose sa tungang gabii, kanunay nga muatubang si Angel (Kristine) sa maong samin dungan sa pagdagkot og kandila ug paghangyo nga ipakita niini unsay nagpaabot nga ugma alang kaniya. Apan ang wala niya masayri, ang maong samin maoy ganghaan sa kalibutan sa mga dautang ispiritu. Unsay nagpaabot nga ugma ni Angel?

Ang "Wag Kang Lilingon" gilangkuban usab og powerhouse cast sama nila ni Cherry Pie Picache, Baron Geisler, Archie Alemania, Celine Lim, Raymond Bagatsing, Dimples Romana ug Marvin. - Ryan Mark