Good luck Anna!!!

Karong adlawa ipahigayon na ang gikahinaman ug usa sa labing enggrande ug hugyaw nga 'bangga sa kaanyag' sa tibuok kalibutan, ang 'Miss World 2006 Coronation Night' nga manukad didto sa Warsaw Poland. Ang Star World mopakita niini sa alas otso karong buntag, samtang paglabay sa usa ka oras maaninaw usab ang maong indiday sa ABC-5 network.

Ang nasud nga pilipinhon nagpunting sa mga mata niini sa pambato nga si Binibining Pilipinas World 2006 Anna Maris Igpit kinsa naningkamot nga makuhit ug masul-ob sa iyang ulo ang labing una nga Miss World Crown alang sa nasud. Niadtong Biernes sa gabii (adlawan sa Poland) gipahigayon na ang pre-judging alang sa dose pa ka mga bulahang kandidata nga maoy maglangkub sa Top 16, sanglit ang upat niini napili naman daan pinaagi sa "fasttrack tickets." Kagabii usab nahuman ang text ug online voting. Atol sa Beachwear competition, si Anna nasulod isip usa sa 25 semi-finalists.

Si Anna kinsa lumad nga taga Panglao Bohol apan dinhi sa Sugbu nagdako walay laing gisaad ngadto sa mga naglaum kaniya, kon dili mao nga buhaton niya ang tanan nga iyang mahimo aron maangkon ang prestihiyosong korona. Apan sa samang higayon ang tanan iyang gisalig sa Ginoo, pinaagi sa kanunay nga pag-ingon "if it's for me, it's for me. Thy will be done."

Niadtong 1993, si Sharmaine Ruffa Gutierrez nahimong 2nd runner-up ug natudlo isip Asian and Oceania Queen of Beauty. Pagka sunod tuig si Caroline Subijano nasulod sa semi-finals. Duha ka tuig ang milabay si Daisy Reyes milangkat sa titulo nga Miss Personality award sa Miss World Pageant.

Pagka 2002 si Katherine Manalo nasulod usab sa semi-final round, misunod si Maria Rafaela Verdadero Yunon isip 4th runner-up; niadtong 2003. Sa tuig 2004, ang garbo sa Sugbu ug pambato sa Pilipinas Ma. Karla Bautista napili isip 4th runner-up ug Queen of Asia Oceania. Last year si Carlene Aguilar misulod usab sa semi-finals.

Hangtud karon dili gihapon makalimtan sa Pilipinas ang tuig 1973 diin diriyot malangkat ang Miss World Crown ni Evangeline Pascual kinsa maoy migawas nga first runner-up. Ang rayna niadtong tuiga nga si Marjorie Wallace sa USA nasugamak sa kontrobersya busa gitangtangan sa korona. Apan si Pascual mibalibad nga mohulip kay kontento ra siya nga magpabiling first runner-up.