Kapamilya nga mga Regal babies

Nagkadaghan na ang mga talents sa ABS-CBN nga sa Regal Films mihimo og pelikula inay sa Star Cinema. Silang tanan, produkto sa "SCQ Teens" kaniadto.

Nag-una sa listahan mao ang pair nila ni Charles Christiansen ug Theo Bernardos sa "Manay Po" nga gisundan usab dayon ni Jason Abalos sa "White Lady." Karon si Paw Diaz na usab, kinsa naapil sa cast sa "Eternity" nga isalida na ugma puhon lukop nasud.

Silang upat, nakauban ug makauban sa ilang counterparts sa "StarStruck", sama nila ni Charles ug Theo kauban nila ni Mike Tan ug LJ Reyes, samtang si Jason nakauban nila ni Iwa Moto ug Gian Carlos ug si Paw makauban nila ni Jennylyn Mercado ug Mark Herras.

Karon duna na usay mapuno sa listahan-si Sandara Park alang sa "Super Noypi" kauban unya nila ni Jennylyn, Mark ug Katrina Halili. Duna pay lain unya nga musunod sa higayon nga mahapsay na ang negosasyon-sila mao si Joross Gamboa ug Roxanne Guinoo.

Ang taho nga dunay mga negosasyon aron ilakip sila si Joross ug Roxanne sa usa ka episode sa "Shake, Rattle & Roll," nga ubos unya sa direksyon ni Rahyan Carlos. Silang duha maoy ihulip nila Iwa Moto ug Gian Carlos.--Maria Daisy S. Hurboda, Correspondent Mahinayon ang laing pelikula ni Ninoy

Dili na gyud kapugngan ang pagmugna sa pelikula kalabot sa kinabuhi ug kamatayon ni Senator Benigno Aquino Jr. nga i-produce sa mega couple nga sila si Carlo Caparas ug Donna Villa.

Personal nga giduaw sa duruha ang mga suspect, nga hangtod karon napriso pa gihapon sa "New Bilibid Prison" sulod sa 23 na katuig ang milabay. Nalipay ang duruha tungod kay ang tanang miabag gayud nila aron makuha ang ilang gikinahanglan nga mga impormasyon.

Ang maong pelikula unya, lahi nga version sa gikatakda usab nga pelikula nga pagahimoon ni Cesar Montano with Marilou Diaz Abaya isip director.