Cindy gidaot, ginganlang bakakon

Subling nabanhaw karon ang mga isyu batok ni Cindy Kurleto human usa ka ginganlan og Tristan ang mi-email ngadto kang Manay Lolit Solis, kolumnista sa PangMasa ug maoy miyagyag sa mga tinaguan sa nahisgutang MTV VJ.

Paminaw ni Manay Lolit nga suod nga higala ni Tristan si Cindy apan nahadlok lamang kining magpaila ilabi na ang iyang gipangbutyag puro gayud negatibo batok ni Cindy.

Sa sinugdanan sa email mihangyo si Tristan nga patambagan si Cindy nga usbon na niini ang iyang dili maayong batasan. Nga unta, putlon na niini ang iyang pagkabakakon ug ang iyang dili katuohan nga paghilak-hilak sa mga interviews.

Matud ni Tristan nga sa baba mismo ni Cindy nanggikan ang mga pulong nga nakadaot sa iyang kaubang mga artista, sama na lang sa intriga bag-ohay lang nga matud pa duna nay anak si Pauleen Luna.

Miingon si Tristan nga bakakon si Cindy kay nagpaka-aron ingnon nga bata pa apan ang tinuod, 28 anyos na kini. Matud pa niya si Cindy usab mismo maoy nanabi nga siya na maoy paborito sa Eat Bulaga kay mas guapa pa siya kay ni Pia Guanio.

Mipasangil usab si Tristan nga si Cindy mismo maoy nanghambog nga nanawag niya si Jericho Rosales niadtong nagkaproblema ang relasyon sa naulahi kang Heart Evangelista.

Gidugang niya nga duna usay gipanabi si Cindy nga dili maayo kalabot nila ni Ariel Revira, Regine Velasquez ug Richard Gomez nga kauban usab niya sa kanhi soap nga Forever in My Heart. Ang maong pagpanaot sa iyang mga kauban nga mga artista matud pa iyang gihimo tungod lamang sa kwarta.

Tungod niini miingon si Manay Lolit nga mas maayo kon mulugwa si Tristan ug pamatud-an ang tanan nga iyang gipanabi.

Dion nagpa-sexy sa Xray cover

Hingpit na nga misugot si Dion Ignacio nga magpasexy alang sa cover sa Xray magazine.

Ang taho nga nadawat ni Manay Lolit Solis mao nga miuyon si Dion tungod kay nasuya siya sa iyang ka batch sa Starstruck nga si Tyron Perez nga mihumot og balik ang ngalan human nagpasexy sa umaabot nga pelikulang "Twilight Dancers og nag-pose nga sexy sa Xray magazine.

Wala pay reaksyon si Dion kalabot niini apan gipaabot nga dili gayud siya moangkon nga nasuya siya ni Tyron.

Pops ug Sandara gilangaw

Gilangaw as in walay halin ang mga magazine diin nagpa-sexy sa cover sila si Pops Fernandez ug Sandara Park. Kahinumduman nga si Pops maoy cover karon sa FHM samtang si Sandara usab sa Uno.

Hinoon miingon ang mga himantayon nga bisan pag wala pistahe sa mga kalalakin-an ang maong mga magazines angayan nga malipay sila si Pops ug Sandara tungod kay natuman na nila ilang pangandoy nga magpasexy sa usa ka magazine.