Zuglu, Proud to be Native Cebuano'

Sa pangindahay nga mabaid ang talento sa ilang mga sakop, pasiugdahan karong gabii sa Zugbuanong Lumad kon Zuglu, diha sa Sutukil sa Nonok St. Tabunok Talisay ang gabii sa musika nga ilang gitawag og "School of Rock, We Don't Need No Education."

Ang Zuglu kapunungan nga karon duna nay kapin 30 ka mga sakop nga banda sa Metro Cebu area. Ang maong kahugpungan nahimugso niadtong December 17, 2005, ubos sa pagpasiugda sa ilang presidente nga si Bimbo Baliguat, dinuyogan sa naglangkub sa ilang konseho nga sila si Ian Bakalya, Jay Dilan, Jayson Kandiyan, JR Baliguat, Randy Baliguat, Sherwin Lopes ug Toper Racal.

Ang "School of Rock" nga mahitabo diha sa Sutukil karong alas otso sa gabii, pagalangkuban sa mga unom ka mga banda sama sa, Black Star, Hot Press and Glue Spader, Rebirth, Mind Spousal, Swake, The Child ug Soul Brother. Ang kalihukan karong gabii, usa lang sa naglinya na nga mga aktibidad sa Zuglu alang sa umaabot nga mga adlaw aron kahatagan og exposure ang mga sakop nila nga banda.

Nadasig ang grupo ni Baliguat nga suportahan ang musikang bisaya tungod sa ilang nabatyagan nga discrimination tali sa mga taga imperial Manila ug sa mga taga probinsiya sama sa Cebu. Buot nila nga ugma damlag pinaagi sa ilang mga paningkamot nga mahatagan og kahigayonan ang bagang duot sa talentong Bisaya, makamugna sila og kabilin diha sa ilang musika.

Ang kalingawan karong gabii, libre ug bugtong gipangayo sa Zuglu mao lang ang tiunay nga pagsuporta alang sa ilang musika ug kawsa. Bisitaha usab ang www.zuglu.tk.com