'Walang Kapalit' puli sa 'Bituing Walang Ningning'

Nagsugod na ang taping alang sa soap opera nga pagabitoonan nila ni Piolo Pascual ug Claudine Barreto ug maoy hulip unya sa "Bituing Walang Ningning" nga mahuman sa September 29, puhon.

Niadto pang July 10 nagsugod ang taping diin sama sa nabalita na dinhi sa Banat Hugyaw, pipila ka mga eksena ang adto pa buhaton sa Hawaii sunod buwan. Sukwahi hinoon sa unang nabalita, dili Maui ang title sa nahisgutang soap kondili 'Walang Kapalit."

Nasayran sa PangMasa ang nahisgutang soap sa pelikula kaniadto nila ni Dina Bonnevie ug Edu Manzano sa Viva Films, ang "Hindi Nahahati Ang Langit" diin apil usab sila si Christopher de Leon ug Lorna Tolentino.

Pwes apil gihapon sa remake sila si Dina ug Edu. Ang "Hindi Nahahati Ang Langit" gikutlo gikan sa nobela ni Nerissa Cabral kaniadto.

Nasayran usab sa PangMasa nga apil sa cast sila si Amy Austria, Jodi Santamaria, Bobby Andrews ug Candy Pangilinan. Kung ang "HNAL" ubos sa direksyon ni Mike de Leon, ang "Walang Kapalit " yak-an ni direk Wenn Deramas.

Viva Films, aktibo na sab

Mibalik na usab og kaaktibo sa paghimo og pelikula ang Viva Films diin tunga-tunga pa lang sa tuig, tulo na ang gisugdan ug sugdan paggama nga mga proyekto.

Nag-una na niini ang "Reyna" ni Keanna Reeves sa direksyon ni Soxy Topacio. Ang sunod mao ang co-production venture sa Viva Films ug GMA Films nga giulohan og "Til I Met You" nila ni Regine Velasquez ug Robin Padilla, sa direksyon ni Mark Reyes.

Sa higayon nga mabalik na si direk Wenn Deramas gikan sa ilang show didto sa States, sugdan usab ang shooting sa "Cute Ang Ina Mo" ni Ai Ai delas Alas diin makauban niya sila si Anne Curtis, Luis Manzano ug Zanjoe Marudo. Gihuna-huna pa kinsay mamahimong leading man ni comedy queen.