Raymart-Claudine wedding puno sa luha

Labihan ka istrikto sa seguridad sa kasal nila ni Claudine ug Raymart Santiago didto sa Tagaytay Highlands diin makaduha mohunong ang mga bisita alang sa security check.

Daghan ang nahibong nganong nagbalikbalik ang usa ka chopper sa venue hangtud nga nasuta nga ang big boss diay sa ABS-CBN nga si Mr. Gabby Lopez ang nagsakay. Gidid-an ang paggamit sa cellphone samtang nagpadayon ang seremonyas sa kasal diin didto na sa wedding reception gitugtan ang mga bisita nga makagamit sa ilang mga telepono.

Nadugay og gamay ang pagsugod sa seremonyas diin medyo madag-umon usab ang langit.

Sa ganghaan pa lang sa dapit diin gipahigayon ang kasal nag-uwan na ang mga pulang roses nga gipanghagbong sa chopper. Malipayon ug sanag ang palibot.

Nabantayan usab sa PangMasa nga murag walay network war sanglit nagpares sila si Mr. Gabby Lopez ug Ms. Wilma Galvante, Ma'am Charo Santos ug Mr. Felipe Gozon, Malou Santos ug Mr. Jimmy Duavit isip pipila lang sa naglangkob sa principal sponsors.

Gikanta ni Gary V ang "The Prayer" diin pagsulod pa lang ni Claudine kauban ang iyang amahan nanghilak na ang tanan nga misaksi sa seremonya.

Sa dihang gibasa na ang wedding vows wala kapugngi nga mihilak na usab sila si Raymart ug Claudine diin sa katapusan bahin na sa seremonyas hingpit nga midangoyngoy.

Makaupat mibalik og sulti ang pastor "You may now kiss the bride."

Dihang gipatindog ang principal sponsors nagdungan og barug sila si Aga Muhlach ug Edu Manzano nga dali usab nga nanglingkod ug nangatawa tungod kay secondary sponsors ra diay sila.

Makalingaw usab nga tan-awon ang kinomedyahay sa cast sa Ok Fine nga sila si Edu ug Aga tali sa mga miyembro usab sa Lagot Ka barkada nga sila si Richard Gomez, Benjie Paras, Joey Marquez, ug Bearwin Meily. Lakip sa mitambong usab sa kasal mao sila si Maricel Soriano ug Charlene Gonzales nga labihan ka guapa,Vicki Belo nga nag-gold gown ug gikonsortehan ni Mr. Johnny Manahan, didto usab sila si Rica Peralejo, Piolo Pascual, Angelica Panganiban, Jaclyn Jose, Carmi Martin.

Nagkuyog usab sila si Kris Aquino ug James Yap present usab sila si directors Wenn Deramas, Olive Lamasan, Rory Quintos, and Chito Roño. Mitambong usab si Megastar Sharon Cuneta ug nagkuyog sa usa ka lamisa ang mga big bosses sa GMA-7 ug ABS-CBN nga daw walay network war.