Rochelle ug Kier manag-uyab na

Nabuking ang relasyon nila ni sexbomb Rochelle Pangilinan ug Kier Legaspi atol sa usa ka christmas party alang sa mga customers sa bar nga gipanag-iya sa manager sa sexbombs nga si Joy Cancio.

Kini tungod kay gikatahong labihan ka sweet sa duruha nga walay hunong nga nagpares og sayaw sukad sa pagsugod hangtud nahuman ang party hinungdan nga wala na sila lung-i og sungog.

Pwes wala nay kalutsan ang duruha hinungdan nga napugos na lang sila pag-angkon nga gumikan sa soap sa sexbombs nga Disesyete sa GMA-7 matag hapon nahimugso ang ilang espesyal nga pagtinagdanay.

Nagsugod sa komedya, sungog-sungog ug giingong nadutlan ra gyud ang duruha sa kadugayan ug sila na ang uyab karon busa dili tinood ang tsismis kaniadto nga si Rochelle ug Jeremy Marquez ang uyab.

Busa nisamot ang pagduda nga tungod kay wala man diay siya nalambigit kang Rochelle, si Jeremy ug Alessandra de Rossi na gyud ang gikatahong murag gipaak sa amigas gumikan sa ka sweet sa usag-usa ubos sa landong sa ilang gugma.